【張慧敏】三姑六婆過年問
2020-01-25
新的一年新開始，循例都有不少記者朋友們問我對來年的薪酬升職加薪各方面的展望的問題，八卦如開工利是點樣封之類的話題我都被訪問過。今年眾多提問之中，我覺得最抵死好玩的，是如何應付三姑六婆塘邊鶴的乞人憎問題。當中不乏牽涉個人私隱，落井下石的，更加不乏尖酸刻薄的。
大小T兩個小時候，都遇見過類似的場面。大T自出娘胎就是個肥妹仔，嗰時過節食飯，兜口兜面語帶譏諷『嘩！做乜鬼咁肥㗎？』。小T細個很瘦削，聲大大問他是否冇飽飯食，『梗係俾你個肥屍大隻家姐搶晒啲嘢嚟食啦！』是咁的，來者不善善者不來，我最崇尚禮尚往來。出於善意大家講笑，當然冇問題，我最憎人以『講吓笑啫駛乜咁緊張喎！』就可以口沒遮攔講完不用負責任，還要樂此不疲，一副你奈得我如何的態度。
既然擺明車馬玩單打的，我豈能不識好歹讓這些冇家教冇禮貌不識好歹的所謂長輩，獨鬥咁寂寞？為我的子女做錯誤示範，作為一個盡責任的母親我當然要是其是非其非。
新春送大禮，今次和大家玩有獎遊戲，估吓我當年講什麼做什麼拆解那些三姑六婆的出口傷人。答中的當然有奬，最多人Like的，還有可以令我讚嘆的答案，可以得到『SON廚房』自製芋頭糕一個。由此文章post在我的Facebook專頁第一日開始計，大家有三日時間嘗試作答。
俾個貼士大家，當日的我，比今日的我更火爆，大家看着辦吧！
作者︰張慧敏
其他文章：