【趙榮德】破解三個在家準備子女考維稚園的迷思!
2020-02-07
有家長用以下自以為是的方法,在家裏訓練小朋友,作考幼稚園的準備,她走來和我討論,要我給她意見。我發覺她的方法全都是教子女的「迷思」(Myths)。各位想知道我怎樣破解她的「迷思」,一定要細心閱讀我們討論的內容:
趙為本人 家為家長
家:我知道免費幼稚園之弱項為英文,為了補救,因此第一個方法為「在家中全英語對話」。我和丈夫及菲傭姐只和個仔講英文,咁樣希望個仔考稚園面試時用流利英文作答,機會大好多。
趙:如果你準備個仔考國際幼稚園,在家「全天候」同佢英文被取錄機會應該十分高,但如果你準備同佢考免費幼稚園或私立獨立幼稚園,就有麻煩,因為差不多全部免費幼稚園都用廣東話考面試,你個小朋友只識講英文,廣東話對佢來講係「火星文」,面對「火星文」,佢一定慌忙失措,唔知點算,就算係私立獨立幼稚園,卻唔係間間用英文考的,萬一用到中文考,你個仔一定講到「古靈精怪」。
家:係呀,佢會用英文口音講中文,句子尾會提高聲音,比較古怪。
趙:咁樣講法,好難收服佢,我提議你哋兩個,爹哋同佢講中文,媽咪同佢講英文,等佢好好學懂兩個語言,考免費幼稚園同私立獨立幼稚園仲實用。第二個方法係乜?
家:明白!第二個係「『全天候』在家照顧個仔」。所謂「全天候」,無論衣、食、住、行,我們照顧到個仔無微不至,等佢一啲都唔使操心,何如:一起身我會幫佢着衫,同佢準備早餐,佢唔識食我哋會餵佢,去街會幫佢着鞋,咁樣,佢一定感受到我哋愛惜佢。
趙:俾小朋友感受到媽咪爹哋愛惜,固然令佢有安全感,但係亦唔需要樣樣幫到十足,例如着衫,第一次你可以幫佢着,第三次教佢試吓自己着,食早餐初時可以餵,慢慢就要佢學習自己食,千祈唔好過份照顧,因為過份照顧會令佢依賴你,愛之過足之害之,果陣時愛便變為縱,你縱容佢,佢便自己唔可以獨立了!第三個方法係乜?
家:第三個方法係「單向在牀上講故事(Bedtime story )」。我哋會每晚喺佢瞓覺前,同佢英文或中文故事。我哋會負責講,佢靜靜地聽,我相信個仔會覺得温馨。
趙:同意。其實牀上講故事,除咗建立親子關係,仲可以令小朋友學講多種語言,點樣學呢?你可以把講故事,由單向變成雙向,由爹哋或媽咪讀,改為你哋讀完到個仔讀,同時要大聲朗讀,俾個仔朗讀嘅好處係佢會更加集中精神,注意每個字的讀音、教事的內容及情節嘅發展。
有時間你哋仲可以5W (who, when , why, what, how)來問一些簡單題目,增加小朋友的閱讀興趣。
家:係喎,一石二鳥,既可以親子,又可以俾個仔「聽、說、讀」一個語文,多謝趙Sir 提供意見。
趙:不用客氣,討論過之後,我知道你一定會懂得點樣喺屋企準備小朋友考心儀幼稚園了!
作者︰趙榮德
其他文章: