【Timtam仔成長日誌】同BB講道理，真係聽得明？
2020-04-03
前日發生咗件事，好想分享一下！
話說爸爸好多時都會同Timtam仔講道理，Timtam仔似懂非懂咁聽，我成日都懷疑只有歲半的Timtam仔係咪真係聽得明！
前日我同Timtam仔打算坐巴士去婆婆家玩，我拎咗一個大媽媽袋（你明有多重），再加一袋食物回娘家，兩個膊頭各掛一個大袋！
拖住Timtam仔出咗門口，係走廊走咗幾步，佢就開始扭抱、大喊、唔行！佢平時都係咁，我諗起朋友叫我要狠心d，訓練佢行多d，今次就堅持唔抱佢，我自己先走去lift口撳lift!
回頭望望佢仍然企喺原地，不忿咁望住我，個樣話我知： 唔抱我! 我就唔行!
我話：好喇！有lift喇！再唔行過嚟，媽媽走喇！
冇反應！
因為我企喺lift口位置佢睇唔到我，我就話：好啦！媽媽走喇！bye bye!
仍然冇反應！
佢聽到lift門關上之後，先即刻跑過黎搵我，佢笑住好似同我玩捉迷藏咁捉住我對腳，真係唔知好嬲定好笑！
入左lift, 我終於嘗試同佢講道理！
我：媽媽今日拎住好多嘢，抱唔到BB! 你睇！媽媽拎住兩個袋好重，你拎吓有幾重！
我真係將個袋俾佢拎下！
BB：…
我: 係咪好重！媽媽抱唔到BB，BB自己行，媽媽去到巴士站再抱抱你，好唔好？
BB: (似懂非懂望住我!）
出左lift，平時的佢就會扭抱，佢今次真係冇喎！拖住佢行多一段路，我再讚下佢：BB拖住媽媽行好叻喎！媽媽去到巴士站就會抱BB喇！
終於……第一次成功拖住手行完全程路！
到底佢真係聽得明我講嘢，定只係一時興起想自己行呢？
不過經過今次之後，我會多d同佢講原因， 解釋點解媽媽要咁做，學習一下用溫柔而堅定的育兒法。
作者： Timtam仔成長日誌
相關文章：