今日我們一走出沙田火車站, 便直往禾輋方向走去… 因為我們想去龍華酒店手作市集.
手持地圖的SY:「點解行極都見唔到警署㗎….呀! 爸爸…見到啦…紅色字寫住龍華酒店㗎」
當愈走愈近, 麻煩的SY大大聲:「乜咁都叫酒店, 咁舊又矮. D人住係邊呢? 我見平時D酒店好高喎」
我即時搶答:「E啲叫歷史, 因為E度開咗78年啦, 爸爸就覺得舊得嚟好有味道, 即係等於我D超合金一樣, 愈舊愈難得呀」
說時遲那時快, 走過掛滿紅燈籠的通路, SY就被忽然開屏的孔雀吸引住…
在場的大、小朋友齊齊叫:「嘩!好靚呀!」SY:「點解隔離嗰隻唔開嘅, (我:可能佢細隻D, 仲係BB掛)」
本來小朋友還想再等孔雀再開屏, 但等了又等, 我看似不對勁, 便建議:「爸爸有D肚餓, 不如陪我食隻乳鴿, 之後我見有攤位遊戲玩喎」
天生愛玩的SY, 一聽到有遊戲玩, 即時跟孔雀說:「拜拜」, 頭也不回就跟了我去食下午茶.
記得上次來「龍華」已經是10年前的事, 其實印象已經很模糊, 只是記得食物算是遊客價錢…
今日揀了非常有粵語殘片感覺的露天茶座, 阿太:「上面個廣告牌一定要影啦…咁得意喎…「嫩鴿肥雞」」
出名孤寒的我, 一家三口便非常寒酸的分享一隻$98的紅燒嫩鴿, 老實說, 雖然較街外貴, 不過, 這個懷舊的露天環境, 不止抵, 直情有賺!!
分享完乳鴿後, 準備去洗手間的SY:「爸爸…你唔係呀? 廁所都要影? 你唔好講笑啦」(我:如果呼吸可以影, 我都想影呀)
走到小庭玩玩遊戲, 阿太:「E啲保齡球, 哥爾夫球, 拋圈圈你屋企米有囉, 仲要玩?」
釋放著無限渴望眼神的SY:「畀我玩啦, 我真係好想玩㗎」$15玩兩次, SY不用10秒Game Over.
我問工作人員:「如果唔要禮物, 可唔可以畀小朋友玩呢?」工作人員:「當然可以啦, 我哋好歡迎㗎, 最緊要小朋友開心」
小朋友有得免費玩遊戲, 這就是我發達的機會, 因為我可以自己逛逛市集…嘩!大量舊香港的名信片呀!
已經收集30多年舊香港照片的Edward :「當年唔捨得D舊建築不斷被拆, 所以就開始儲D相囉」
(E度邊度嚟㗎?) Edward :「上面米係TheONE, 即係之前東英大廈; 下面米係星光行, 同1881囉」(我:係喎!真係喎)
因為想有更多年青人認識舊香港, 所以Edward很樂意向任何人解釋每張相片的故事.
Edward :「E個薄扶林瀑布, 你睇幾靚, 當年就係佢吸引咗唔少外國人嚟香港㗎…」(我睇完E張相, 好有衝動去睇條真‧瀑布)
之後我發現市集竟然有麵包賣, Winzy :「我本來賣輕黏土, 但反應麻麻, 咁啱前排開造麵包, 於是就試下賣埋包囉」
(我估反應會幾好, 因為市集好少賣包), Winzy :「係呀! 反應好好, 好多人仲問之後點可以再買到我D包, 真係好開心」
原來Winzy除了正職, 工餘又參加市集, 還有進修, 她說:「我擺市集的原因, 就係因為我要寫一篇8000字, 關於市集的論文囉」
(嘩! 你咁忙, 趕唔趕得切交文㗎?) 笑笑口的Winzy :「5月先交, 所以減少咗時間做輕黏土, 因為麵包可以用少D時間」(實戰經驗充足的妳, 篇文一定會好高分!!)
因為我想買一個小布袋放我的Bearbrick, 所以一見Rose的手縫布袋, 即時開心到不得了.
有2年手縫布袋經驗的Rose:「如果Size唔啱, 可以訂做呀! (妳D布好靚), 全部都係台灣布嚟, 我自己都好鍾意」
(我最初以為D圖案係妳畫嘅) Eddie:「簡單嘅花…(白布袋), 先係我畫」
其實我到Rose檔位, 已經看中了白底公仔圖案, Rose:「你想要嗰款袋, 無E個公仔布, 我即刻做畀你, 2-3日再同你交收」Yeah! 今日買了一個靚袋.
臨走前, 小朋友又被小印台所吸引, 其實, 我也不明白. 任何地方, 任何的紀念印章, SY一定非常熱衷, 印完又印, 印過不停.
(小朋友…差唔多走啦!) SY:「我想印呀! (我:咁印多張啦), 我要印好多好多張呀!」幸好有姐姐幫口「調校」一下, 小生番才得以印3張收手. Safe!
十年人事幾翻新, 反而「龍華」十年的變化又不太大. 不過, 老實說, 懷舊還懷舊, 我希望「龍華」的部份建築也可以修葺保養一下.
今日用作戶外集市的小園林, 非常寫意, 當年全港出名的「園林酒店」絶非浪得虛名. (單單有一座迷你鳥居作影相位, 已經一絶啦)
工作人員說, 可能四月將會有另一個市集, 如果宣傳再多一點, 遊人再多少少, 氣氛會更加熱鬧.
「龍華藝墟」活動詳情：
日期：2016年2月27至28日 (周六及周日)
時間：上午11時至下午6時
地址：沙田下禾輋村22號龍華酒店
作者：大仁生活
大仁生活facebook
