【和牛b的成長日記】激嬲媽媽嘅一句話。隊友必睇
2020-04-07
湊小朋友好攰,特別湊初生就更加攰。
再加上我係餵母乳,初生BB埋身食奶次數好频密。
所以,基本上無得唞。
不過,初生BB最常就係出現日夜癲倒情況,日頭幾嘈都瞓得著,夜晚好寧靜反而扭到天咁濟。
就喺媽媽日日瞓好少嘅狀態之下,聽到明明每晚都瞓到葛葛聲嘅隊友講
「我好攰呀,尋晚瞓得差,好似無咩點瞓過咁」
「尋晚BB無喊過喎,真係好乖」(係喊咗好多次,你都聽唔到咋)
聽到咁嘅說話,又點可能叫媽媽唔氣上心頭丫!
奉勸隊友,可以試下咁講
「我好攰呀,尋晚瞓得差。不過點攰,都唔及老婆你照顧BB咁辛苦,錫晒你呀老婆」
講返湊BB最辛苦嘅係,初生BB常有日夜癲倒嘅情況。
無論日間時間,幾嘈都瞓得著。
到夜晚特別係夜深時份,BB明明抱住瞓冧咗,點知準備放落牀就會即刻大喊。
然後又抱返入懷抱,經歷無數次…直至天光
送張圖俾大家,絕對係父母心聲!
到底每晚,要經歷幾多次,先可以收工瞓覺呢?
作者:和牛b的成長日記
————————————————–