【Kidult Daddy】坐月湊仔優先 尷尬放埋一邊
2016-04-16
一個滿面鬚根、披頭散髮、神情呆滯、短褲踢拖的中年男子，閃出百貨公司的升降機，慢慢走近一個內衣專櫃。
「唔該⋯」男子冇厘神氣的喃道。
「有⋯有乜可以幫到你。」店員連退兩步。
「唔該⋯我想配多一件，你地有冇貨？」男子從紙袋中抽出一個胸圍。
「⋯」
「之前買唔夠，濕咗洗了乾唔切，想買多一兩個。」男子補充。
「唔⋯我睇睇。」店員好像明白了甚麼。
「Thanks。」男子意會到店員的肢體語言，望望鏡。「嘩！頂！」立即撥一撥頭髮，點知愈撥愈亂。
「很少人會自己一個人來買。」店員已經完全明白並冷靜下來，並進入了 Aggressive Sales Mode。「是餵母乳吧。很容易弄濕的。不如買多三四個替換吧。」
「兩個得啦。」男子也進入 Defensive Consumer Mode。「只係買少少後備，驚洗唔切。」
「四個好D」同「兩個得啦」大約僵持了十五分鐘。最後男子不致失守，在母嬰用品內衣舖只買了兩個哺乳胸圍，頭髮依然散亂。任務完成，打道回府。
故事說到這裡，但這的確是活生生的分享。當太太辛苦地坐月休養但又要餵母乳的情況下，男人老狗去幫手買胸圍來得理所當然。這是一個合理需求，更沒有尷尬的必要，雖然場景會有少許攪笑。
生育是一個非常特別的經驗，無論是媽媽爸爸還是整個家庭，都是新角度新體驗。成為父母之後，就算是平常不太相熟的朋友，也會不忌諱地分享經驗，畢竟每個生產育兒經歷都不太一樣，變數太多，汲取多些經驗和睇法，也使 Parenthood 變得更生活化和多姿多采。
有次幾個同事食午飯，有女同事剛放完產假回來，加另一個媽媽同事個仔兩歲，而我個仔半歲多。講開一些產後問題，出現了以下的對話：
「阿囡D屎噴得好勁又好難抹，有冇方法？」「盡量用手兜啦。因為太 sticky & stinky，落咗衫仔牀單傢俬清唔到架，黐落手反而好快就甩。」「記得小心清潔好重要部位，小心唔好感染細菌。」
「你地用邊隻牌子奶泵？我泵得好差。好谷又辛苦。」「陪月教我用手鬆可能仲易啲喎。你叫老公幫下手揸啦。」「多出的奶記得用來護膚周圍搽下，千祈唔好浪費呀。」
同枱另一個二十出頭的男同事，愈聽愈尷尬。見我們高談闊論，只能靦腆的說：「原來生仔真的好多學問⋯」我們笑說，其實一點也沒有想到尷尬，因為這些都是生產過程一定會經歷的情況，情況就同看醫生相似，都要講得很明白才有用。當然，以上對話全是朋友之間吹水，全部只是經驗之談但並無醫學跟據，唔好盡信。哈哈。
所以，下次見到滿面鬚根、披頭散髮、神情呆滯、短褲踢拖、用紙袋載著胸圍的中年男子，未必一定是變態佬，也可以是老婆坐月中的新手爸爸。
作者：Kidult Daddy