【張慧敏】男仔之家跳乜舞?
2016-04-27
「我個仔最近唔知發乜嘢神經,好似失心瘋咁淨係鍾意跳舞,搞到我哋一家家嘈屋閉,我知道你個仔都有學跳舞,想聽聽你意見,點樣可以教好佢。雖然我老公唔鍾意,認為男仔之家學乜人跳舞,但因為被老師推薦,我唔想得失學校,又有機會可以出去參加比賽,對日後升學揀學校都有幫助,所以講掂老公俾佢去,點知會出事!為咗避免佢繼續沉迷影響學業,最近學校話要佢去外地比賽,為咗佢可以收拾心情好好準備出年DSE考試,我老公一口拒絕話唔去得,佢竟然發晒癲,佢從未試過咁惡同我兩公婆講嘢!我覺得學校好有問題,有乜理由要我個仔放棄學業去比賽幫佢學校爭光?其實一開始就唔應該俾佢去參加呢啲無謂興趣班,俾佢學壞咗依家關係搞到咁僵,除非逼不得已都唔想同個仔轉校,但似乎冇其他方法。真係好後悔當日俾佢學跳舞!」
我以為時光倒流70年,我無法相信到了今日依然有食古不化未開發、認定女孩子只能玩洋娃娃男孩子只能玩槍的父母。
長篇大論講嚟講去我完全看不出你兒子有甚麼不乖不聽話、學校又有甚麼做錯或者自私沒有理會你兒子學業的行為。我看到的是你兩公婆一廂情願堅信父母有權更是理所當然地操控兒子的一生及一切,你兩夫妻根本從來未有理會關心過兒子的感受,有冤無路訴的委屈還有無力無奈,我完全可以想像得到,你兩個身為父母的竟然可以無動於衷?想要聽教聽話只會順從不會駁嘴不會反抗,即使養隻貓養隻狗都没有可能,乾脆買隻機械人玩玩就算,究竟點解要生個仔出來折磨折騰全家人?
我相信你挖空心思不惜一切無非想兒子讀大學,走一條你們認為最有前途最亮麗令你們最有面子最康莊的大道。你兒子既然有天份又熱愛跳舞,演藝學院固然是一條出路,跳舞除了是藝術還是體育運動,傑出運動員這個身份,一樣可以為他換來本地或外國的大學入學證及奬學金。
你們不是要把兒子的逼上絕路才安心吧?更加強烈推薦你兩公婆看看《狂舞派》感受一下年輕人的熱血吧!目前最需要開導輔導的是你兒子,請告訴他我很希望有機會和他對話聊聊天。
各位讀者如果遇到一切跟親子有關的問題,歡迎電郵至forum@careerdoctor.hk,我會按緊急情況及收到的先後次序作答。
作者:張慧敏
(文章逢星期三刊登)
其他文章:【張慧敏】不如不愛