【張慧敏】中學生可否談戀愛？
2016-05-04
「希望你不要介意我叫你一聲Son媽，我真係好羨慕大小T可以有一個好似你咁明白事理又肯講道理嘅媽媽，如果我媽媽好似你咁就好，唔使搞到依家唔知點算好。我知佢好錫我好想我好，但係我大個啦，我唔係一個三歲嘅細路仔任由佢擺佈，我知佢安排我讀女校係唔想我識男仔，唔想我咁快拍拖影響學業，又驚我會學壞做錯事。但係我識咗依家個男朋友之後成績絕對冇差到，反而因為有佢喺度陪我讀書，今年DSE我哋兩個都非常有信心，可以一齊考到大學。其實我男朋友都係名校生，我都唔知我阿媽驚乜？早知係咁我應該同佢講大話，我唔應該對佢坦白，我唔明白由頭到尾佢反對乜嘢？最令我難堪係佢竟然打電話俾我男朋友個屋企，叫佢父母管教下佢個仔唔好煩住我，我知道之後質問佢，佢打橫來講唔肯認錯仲話係幫我，又話堅持要送我出國讀書，但係我根本唔想！佢做咁多嘢無非想我同男朋友分手，我18歲了，佢根本管我唔到，我係點都唔會去外國讀書的，我同男朋友嘅感情係認真嘅，Son媽我可以點？」
正如你自己所講，你媽媽如此緊張出發點無非因為愛，但就是這種操控霸道橫蠻無止境無盡的愛，令你窒息！首先我要多謝你欣賞我，但先旨聲明，我立場鮮明，是不同意年青人在求學階段談戀愛的。除了大小T，我的一班仔仔女女即使經已投身職場，要是有志在事業方面追求發展，我都不贊成他們拍拖。
但你確是個乖乖女，我絕對相信你做人做事都有分寸，只是你媽媽不懂得拿捏究竟應該如何愛，更加不明白你對她的尊重及信任，你肯主動向母親坦白，是十分難得的一件事。Son媽非常感動，更加十分欣賞你！
不過話說回來，應該留在香港讀大學還是把握機會到外國讀書，我想請你心平氣和聽我講幾句，現階段我會勸你不必執着愛情行先，應該看看大學放榜情況是否真的如你所願，趁機參考一下要是到外國能夠讀的大學及科目，考慮清楚之後再決定未遲。
18歲的你很年青，情愛究竟是甚麼一回事，有些人窮一輩子都不知道。真正情投意合如魚得水開花結果終成眷屬live happily forever的愛情，百年難得一見！人的思想，會隨着年紀及環境的變化有所改變，這世上最經得起考驗的，是愛情！你倆要是真心相愛，分隔愈遠只會愈思念對方，不會成為分手的理由。把我這篇文章給你媽媽看看吧，若然她有意見想發表或發問，我樂於解答，隨時候教！
各位讀者如果遇到一切跟親子有關的問題，歡迎電郵至forum@careerdoctor.hk，我會按緊急情況及收到的先後次序作答。
作者：張慧敏
(文章逢星期三刊登)
圖片：電影《那些年，我們一起追的女孩》劇照
其他文章：【張慧敏】男仔之家跳乜舞？