【倫爸爸】光 | 水 | 焦距
2016-05-09
今次想講焦距嘅選擇，了解自己嘅工具，同上次「遠 | 近」唔同。上次主要講相中主體嘅比重，今次係講我點解要用35同85嘅焦距。兩者可以話有關係，但同時冇必然關係，因為長焦距鏡可以影wide shot，短焦距鏡亦可以影close up shot。
同以往一樣，都係繼續用35同85定焦影。由於拍攝地點係迪欣湖一個有水玩嘅公園，所以需要小小準備工夫，如小朋友嘅替換衣服、蚊貼、防晒等用品。
「玩水」係一件事件，我所做嘅就係以我嘅視覺去記錄，記事就要有記事嘅方法，應該盡量唔介入事件度，所以我唔會叫佢望鏡頭等動作，一切以自然要主。 記錄得好唔好，其中一個因素就係同被攝者嘅距離，簡單嚟講就係要同被攝者嘅距離近，愈近亦會愈容易接觸到被攝者嘅世界。所以影「玩水」就要進入被水包圍嘅世界影。
1. 不要慳Shutter。
由於部分用35L以比較近嘅距離拍攝，水珠會不斷打在機身及鏡頭上，當然我並不反對有水點喺鏡頭上，亦認為會令相片更有氣氛。但有時水點太多或水點喺唔理想位置就不得不處理。用35嘅時候基本上筆者係一邊影一邊抺鏡頭。要影20~30張先拍到理想嘅畫面係完全唔意外。
2. 唔好怕整濕相機(同自己)。
一般而言，遇到類似情況大家都傾向以長鏡喺外圍拍攝。以免整濕自己及相機，用長焦距影唔係問題，但角度會比較單一。焦距愈長， 影出嚟嘅相就愈接近水平，變化亦較少。所以，當你手上有防水能力較好嘅相機，不妨行近些以50MM以下嘅焦距嚟影，感受下水珠打喺身上、溫度及光線，接近小朋友嘅世界。你會發現影相係會更有趣。(筆者以5D2、35L、85.8拍攝，影完抺乾，回家即放防潮箱，結果冇事。當然，如果你影完壞機就唔好搵我)
作者：倫爸爸