【上堂變玩RPG】發動技能可:遲一日交功課、上堂食嘢!
2016-06-07
「如果返學可以返到好似冒險咁,會係點樣嘅呢?」呢位學生嘅問題,成為咗加拿大一位高中物理老師嘅靈感,開發出一個教學程式。學生只要上堂儲夠「氣」就可以發動技能,隨時可以遲交一日功課、上堂食嘢,甚至係考試時間獲延長8分鐘!
教學程式Classcraft讓老師幻化課堂成為遊戲;學生將會好似玩RPG角色扮演遊戲咁分成3種身份,治療師(Healers)、法師(Mages)以及戰士(Warriors)。每個身份都有特定技能,如果有良好表現就能夠獲得經驗值(XP),夠XP就可以升級,技能當然亦會更強,創意無限,全部都係學生夢寐以求!
▲例如第2級嘅治療師可以發動「神的恩寵」,個恩寵就係上堂做功課時可以聽ipod!最高級嘅治療師更可以發動「神聖祈禱」,可以考試期間睇自己嘅notes!!!
▲法師最強嘅技能並非可於上課時間離開2分鐘嘅「隱形術」,亦非喺考試獲額外8分鐘嘅「時間扭曲」;而係全隊同學都可以喺考試獲額外8分鐘嘅「法師圓法陣」,以及全隊都可以獲考試一題的tips嘅「千里眼」。
▲戰士嚟講,最吸引嘅一定係可以延後一日交功課嘅「埋伏突襲」喇;而且比法師強嘅地方,係有機會發動「神秘武器」,喺考試期間獲得老師嘅重要tips。
玩遊戲當然有得必有失,如果遲到、hea住上堂、唔交功課都會被扣「生命值」(HP),如果扣到零,學生就要受罰,例如留堂、提早一日交功課、喺班上背一首新學嘅詩等等。
Classcraft創辦老師Shawn Young喺介紹短片提到,現時嘅教學方法與一百年前相若,認為係時候作出改變,因此為學生編寫出這個遊戲,望發揮學生潛能,提升學生投入及合拍程度。「過去3年一直與學生試玩、改進,效果滿意,師生關係改變,學生亦會互相幫助。」
▲Shawn Young望能在課堂中建立正能量
▲程式提供多國語言版本,包括繁體中文
有使用Classcraft嘅歷史老師接受外國傳媒訪問,表示學生嘅小測成績,以及課堂參與度都提高。「有消極的學生在過去不顧自己成績,但現時為怕影響自己角色的等級,以及整隊的水平,變得好戰起來。」他同時指,「過去未用Classcraft前,我也會為自己課堂順暢、有趣而感到自豪。但啟動遊戲,我留意到課堂的脈搏改變了。」他舉例,學生會準時衝去上堂。
來源:Classcraft、Venture Beat
Classcraft及網頁影片截圖