帶小朋友親親大自然感受田園氣息，不失為親子好節目，但最近天氣時好時壞，要順利成行都唔易。想唔受天氣影響體驗自然生活？爸媽可以參加喺7月中，於亞洲國際博覽館舉行的「Happy Farm」活動，可以一邊嘆冷氣，一邊享受田園樂趣，仲可以親親小動物同吹氣樂園添！
活動共分為4大部分，分別是水果遊樂園、動物探索之旅、田園耕種樂同DIY親子工作坊，小朋友可以透過唔同嘅活動探索自然。
水果遊樂園
場內設有迷你農墟，多位本地農夫將會即場售賣最新鮮水果，大人買得開心，細路食得放心。水果區仲有多個以水果為主題嘅攤位小遊戲，向小朋友講解本地水果趣味知識。
動物探索之旅
現場有寄居蟹、水母、海星等海洋生物，仲有鸚鵡、小白兔、倉鼠、龍貓出沒，除咗同佢地影相之外，小朋友仲可以近距離接觸動物添！
田園耕種樂
今年大會將農地搬入室內，令小朋友唔駛再受天氣影響，都可以嘗試播種、插秧，了解「粒粒皆辛苦」嘅道理。
DIY親子工作坊
透過好玩嘅DIY工作坊，由專人親自教小朋友整小手作，不單只可以自由發揮創意，仲可以整出獨一無二嘅作品，小朋友一定會樂在其中！
除咗以上4大主題，現場仲有刺激又好玩嘅充氣遊戲樂園，等小朋友可以盡情放電，享受不一樣嘅假期！