【Draw the Drops】我出書了
2016-07-07
我嘅第一本著作誕生了,謝謝一直支持我個page同blog嘅各位!也抱歉一直無預告亦無宣傳,因為我怕自己完成唔到,要完成一本書比想像中難好多……
坦白講呢兩年做全職媽媽,一早已將自己嘅事業同興趣埋喺床下底封塵…… 毫無疑問,可以每分每刻陪住囡囡,見證住佢嘅每一個小成長,的確係幸福、感恩同難得。但…… 由一個有工作拚勁嘅人轉做全職媽媽,每日喺屋企,雙手唔係洗緊嘢就係抹緊嘢,我有時都會問自己,以後會點?
機緣巧合,一個非常有心嘅編輯,打開咗一扇門俾我…… 初初我都覺得係mission impossible, 一日24小時湊囡囡,其實邊有時間做書,但呢個係我細個嘅志願,亦好想囡囡見到一個會努力會堅持嘅媽媽…… 於是呢幾個月,日頭湊女,夜晚陪到囡囡瞓著就即刻開工到天光~ 而最慶幸嘅係,囡囡都好似明白我咁,以前佢一晚喊醒幾次搵媽媽,有日突然開始一覺瞓天光,日頭仲會自己睇書玩玩具,話「媽媽做嘢,唔好搞媽媽~」
原來做咗媽媽都可以做到自己想做嘅事,我做到了,希望你哋都可以!做咗爸媽可能做咩都有顧慮,但亦因為做咗爸媽,我哋先有更大嘅推動力!我非常用心用力去做嘅一本書,希望大家唔睇都買吓,唔買都睇吓,唔買唔睇都share吓!
《新手爸媽打氣書》— 與你經歷0-1歲最甜蜜的負荷
插畫/文字/設計/排版 by nie chamak
希望可以⋯⋯
給準爸媽一點小準備,
給新手爸媽微笑共鳴,
給經驗爸媽重溫回味。