【媽媽幫媽媽】 母乳 朋輩組織助拆解6大餵哺問題
2016-07-11
衛生署主辦、「自然育兒網絡」承辦的「母愛蜜語」 母乳 餵哺朋輩支援計劃，由有授乳經驗的媽媽，以媽媽助媽媽形式，為有意餵哺 母乳 的懷孕及新手媽媽，提供朋輩支持、鼓勵，分享正確哺乳資訊。項目策劃徐瑩指，經常面對新手媽媽不同問題，以下6大為最常見，今次特別拿出來跟大家拆解：
1.生B前買定奶泵？
徐：唸住全 母乳 的媽媽，不用急於懷孕時買奶泵。先熟習點餵，餵得好，返工前一、兩星期，買奶泵回來泵奶便可。
2.唔係要儲定成個月奶咩？
徐：網上常見到成雪櫃奶的相，好似鬥奶多，其實沒必要。奶儲太耐，營養會流失。亦有機會奶量太多，導致媽媽乳腺阻塞發炎，所以我們強調供求平衡，最好一、兩星期前泵定。
3.等奶量夠多才餵？
徐：聽明星新手媽媽話，初乳唔好餵BB，等母乳變多變稀才餵。但要等幾時？愈早埋身餵，奶量才會多。且初乳含極豐富抗體，是BB所需，更應早餵。
4.隔幾個鐘餵1次？
徐：餵母乳唔似餵奶粉，固定三、四小時餵一次。主要係BB想吃，就埋身餵，可以是一、兩、三或四小時，全看BB需要。
5.食幾多為之足夠？
徐：母乳唔似奶粉，有晒份量，所以我哋唔睇食幾多，反而睇「輸出」：BB體重有無增加？大小便量是否足夠。無問題，就可以。
6.長輩反對點算好？
徐：千祈咪正面衝突，如說：「BB食母乳好過奶粉。」老人家肯定駁話：「我以前餵你食奶粉，你咪一樣肥肥白白！」站在道德高地，無好結果。最好搵老人家的朋友，跟他們講；又或帶他們聽講座和分享會，多了解，自然明。
學員心聲
Hester（下圖）：餵母乳知識網上隨時找到，但過來人分享真係甚少。計劃能回應所需，給予正面支持。而且，有電話和FB跟進，好貼心。
查詢：http://npnhk.org/bfpc/
撰文：馮淑玲
相片：被訪者提供、網上圖片
相關文章：