【仙妮】丘BB伊利沙伯醫院出生記
2016-07-22
哇！差不多四個月冇update ，實在非常抱歉啊！我的小寶寶出咗世都剛剛三個月大了！在這段時間有好多好多經歷想分享，可惜之前電腦又壞咗，顧住湊B唔得閒整。。。不過而家OK返晒，生活漸上軌道，希望之後可以有條理地逐一分享啦:)
今次首先講吓我生B嘅經歷先吖～今次篇文有D長，因為真係痛咗好耐！
丘BB本來嘅預產期係4月18日，不過就到都冇動靜，所以18/4返伊利沙伯醫院產檢時醫生寫咗紙畀我25/4入院催生！
而另外19/4 去咗私家產檢照超聲波時，醫生話BB已經有7磅4安士！比一個星期之前重咗1磅2安士!!! 我當堂嚇一跳，因為一直都以為六磅幾就冇生得咁辛苦，完全冇諗過會生個七磅B！
接下來幾日都冇乜動靜。。。
直到21/4：
凌晨1:30am－沖完涼準備瞓覺時就見紅，即刻執嘢入醫院。
2:30am －出到佐敦見冇乜痛所以去食咗個魚柳包醫肚，費事到時冇力生！
3:00am －辦入院手續及檢查
4:00am －入到產前病房，駁機聽BB心跳+如果BB郁就要撳掣。好神奇～一上咗病床，宮縮嘅痛楚即刻加強咗！不過就差不多15分鐘先痛一次
監察BB心跳機
7:00 am－宮縮由十分鐘一次慢慢就變成八分鐘丶七分鐘。。。姑娘叫我到五分鐘一次就叫佢
9:00am －醫生巡房，仲未到五分鐘一次。。。
11:00am－宮縮忽然變返冇規律，有時15分鐘一次！姑娘話如果見紅之後三日內生唔到就要催生～由於成晚掛住計時完全冇瞓過，所以爭取時間眠一眠，不過一痛就醒！
3:00 pm－持續冇規律嘅痛。。。好漫長！姑娘話如果想快D就去坐波波，BB個頭會快D落到正常位置，所以我就去坐咗幾次波波，痛時就停一停！
坐波波～
如是者，痛吓停吓整整一日。。。
直到22/4：
凌晨1:35am －痛楚進一步加劇，10分鐘一次
2:44am －6分鐘一次，但已經頂唔順，於是撳鐘呃姑娘5分鐘一次喇！㸃知姑娘好冷淡嚟撳熄我個鐘話「3分鐘一次先再叫我地啦！」我即刻覺得好沮喪。。。
3:45am－好不容易到咗4分鐘痛一次，我竟然痛到叫「救命呀！！！」我又撳鐘呃姑娘已經3分鐘一次，叫佢同我check 吓開咗幾多度！㸃知佢話「都未開！」痴線㗎！真係痛到想講粗口呀！！