【聽障生去Starbucks實習】健聽生:我哋做到嘅事佢哋都做到
2016-08-04
今時今日小朋友若有殘疾,可以得到醫療技術幫助;不過爸媽始終會擔心孩子日後的發展。香港Starbucks近月舉辦青少年職前培訓活動,首次邀請聽障同學參與,有聽障同學表示參加活動後變得大膽咗,證明科技只為輔助,合作與互諒,才能真正達至共融,助殘疾孩子發展所長。
學生分享 傷健共融兩大貼士
升中六的梁嫚芝來自路德會啟聾學校,自出世便患有嚴重聽障,過去有很多不快經歷,「因為表達得唔清楚,令對方覺得好煩而被拒絕。」得到老師鼓勵,她參加了由Starbucks與非牟利組織「國際成就計劃香港部」舉辦的「 青年發展計劃 」,與健聽同學合作做project及匯報,最後更成為優勝隊伍。同組同學、來自聖安當女書院的陳凱盈(Coco)認為,勝出原因在於合拍,「題目係要為Starbucks提出建議,幫佢保持競爭力。我哋拍咗條片,針對聽障人士日常生活嘅難處, 建議Starbucks加強對員工的手語培訓。」
▲嫚芝(左一)與同學將平日聽障朋友會遇到嘅困難模擬出來
▲Coco(左一)和隊友在第一階段表現突出,晉身第二階段後有嫚芝(右三)加入,再下一城
除了分享自身經歷,擅於設計的嫚芝更負責了報告的設計部分,令匯報生色不少。有關傷健共融的貼士,嫚芝第一反應是:「不要歧視我們。」Coco補充,「其實正常人有嘅興趣,佢哋都有;正常人做到嘅事,佢哋都做到。」至於實際方法,Coco建議可多用文字溝通,「今次好幸運,活動期間一直有手語老師參與。但老師唔喺度時,我哋會利用WhatsApp,文字其實好幫到手。」
▲Coco坦言要接受聽障人士和健全人士有所不同,但不應戴有色眼鏡
落舖實習 聽障生動腦筋解難
活動另一大特色,是優勝隊伍可以晉身第三階段,落舖實習。一個Starbucks員工,基本上不分級別,從點單、製作食品及飲品,到清潔都要參與,Coco和嫚芝都不例外。所以嫚芝遇到困難就要想方法解決,「經理話我知時間控制得唔好,會影響飲品嘅味道。健聽嘅人只要聽到咖啡機噴出嚟嘅聲音,就知時機啱唔啱,但我聽唔到,就要自己喺心入面數,同埋要『莊』吓部機入面的情況。」經理都對嫚芝讚不絕口,「其實佢好有心,好細緻嘅嘢都會問清楚;佢好努力去表達自己,好有熱誠。」
▲細心的嫚芝被安排負責調配飲品
▲Coco喜歡與人接觸,特別勝任為客人提供試食及介紹產品的工作
傷健共融 從教育下一代做起
Coco透過活動三個階段,認清了自己喜惡及長短處,希望日後從事傳媒工作。九月開學後踏入活動最後一個階段,她會跟全校同學分享多月以來的得著。至於嫚芝,她表示活動助她認識健聽人士的文化,「以前因為好少機會同健聽人士溝通,會比較細膽,收埋自己。但今次令我大膽咗,冇咁怕表達。」她希望考完DSE後,能夠升讀IVE,日後從事與設計有關的工作。
香港Starbucks表示,是次活動希望為青少年提供機會及職業發展培訓,推廣「生涯規劃」,今年有超過400位同學參與。此外,他們近年亦有聘用傷健人士,讓他們發展所長。爸媽們都不妨多向孩子分享與傷健人士正確的相處之道,多些包容、忍耐和欣賞,為建共融社會出一分力。
撰文:方子晴
攝影:黃頌偉