【奇特育兒術】日本小朋友放學去「麻將教室」打番8圈先
2016-08-11
劉德華講過：「牌品唔好，即係人品唔好。」打麻將又點只可以鍛煉人品？有一班日本家長喺小朋友放學後，竟然唔係帶佢哋去補習班，而係去麻將教室打番八圈，仲話小朋友學打麻將之後，集中力同觀察力都大大提升！
日本東京電視台一個綜藝節目，其中有一個環節「奇特育兒術」，專門發掘一些特別的培育小朋友方法。上月底播出嘅一集，電視台就搵到今年10歲嘅小雪，佢由5歲起已經去麻將教室上堂。
小雪喺教室有機會跟唔同年紀嘅小朋友過招，包括中學生。小朋友打麻將唔涉及賭博，大家會以分數比較高下。麻將訓練除咗著重技巧，亦會教授正確嘅禮儀，即係香港人所講嘅「牌品」。
採訪當日，小雪就被呢位中學生食咗一鋪「大三元」！
最令人意想不到嘅係，原來教室嘅老師都有唔錯嘅學歷，亦包括大學生。老師就話，學打麻將好多時要運用到概率嘅概念。
小雪嘅媽媽自己都係名校慶應義塾大學嘅畢業生。佢接受訪問時表示，囡囡自5歲開始學打麻將，之後集中力、觀察力都大幅提升，心算最強，考試仲成日100分。佢又指，小雪返到屋企唔會匿入房打機，打麻將成為佢哋一家人嘅親子活動。
喺日本呢間並唔係唯一嘅教室，坊間更有不少麻將協會，又會舉辦少年麻將大賽，同香港嘅麻將館並不一樣。撇開賭博，睇嚟打麻將的確有唔少好處，爸媽們又會唔會考慮向小朋友親授打牌秘笈？
網上圖片