年宵部隊等足一年, 昨晩農曆年廿四終於可以再出動啦!! 今次由SY一帶一老一更老逛維園…年宵我來也!!
SY:「今日真係好凍, 爸爸! 你有冇試過再凍D行年宵?」去年情人節過後才新年, 天氣和暖, 記得當日一件長䄂Tee 就OK!
今晚11度天氣, 對怕冷的阿叔, 極大挑戰. 我對SY說:「記唔記得4年前年初二我哋去昂坪360, 得4度咋」SY大叫:「我話行花市呀! 唔係360呀!」
近門口有「兵仔」攬枕, 郭同學推介:「女神遇著兵, 我哋有5款, 「水兵」最有錢, 小朋友你知唔知咩係兵呀?」(影定相就啱…我估佢十年後都係做傘兵多)
(檔位編號52)$98/個
「唐老鴨個PatPat呀!」SY大叫, 這檔「猴尾枕」的同學們超熱推介:「我哋仲有比卡超, 小新, 胡迪, 墊住睇電視好舒服㗎」我鍾意佢哋個質地!
(檔位編號86)$110/個
無端端場中間可以免費「掟蕉」…發達啦!! SY:「爸爸! 唔係掟個樣呀…係掟入個口」(我知…不過我想掟好耐㗎啦)
大公仔痴漢一望到大大隻熊本熊, 第一時間跑了過去合照, 原來是
丙組球隊「葛士寶」買了部長的版權.
工作人員問:「小朋友你鍾唔鍾意踢足球呀?」原來今次年宵, 就是為培育有品格小球員, 「青訓」計劃籌款. (踢波好呀! 我都想同阿囝報名, 放電一流)
(檔位編號149-150)
我問SY:「你食唔食雪糕呀? (好呀!好呀!), 你睇幾大個雪糕!」失望的小朋友:「車!假嘅, 都唔係真雪糕」
這是可以放紙巾的甜筒雪糕, 現場睇真的好有Feel… SY:「又唔食得, 放廁紙有咩用吖? 咁大舊…」(點解你口吻咁似阿太??)
(檔位編號223) $168/個
理大專上學院的同學們第二年賣比卡超…我:「連續賣兩年都係比卡超?」, 同學們好雀躍:「童年回憶麻, 你應該都係睇比卡超大喎, 我哋似同年代…」我即時超大力點頭:「梗係!」
(檔位編號137)
全場最似實物, 我真的以為「凸出街市」是街市…姐姐問SY:「你鍾意鍾意食菇菇㗎?」(佢真係好鍾意食喎, 妳點知呢?)
陳同學, 屋企人真的在街市經營菜檔, 三文魚, 紹菜, 冬菇似得連SY也細細聲跟我說:「個菇菇…我頭先以為食得…」
原來, 一直坐在三文魚上的姐姐對SY說:「你摸下, 坐下, 個三文魚真係好舒服㗎」
(檔位編號154) $88-$138
當我們再向前行…SY拉一拉我:「係米寫錯字呀? 「吉」字先啱麻」, 二次創作呀!
燒野家最有親切感, 因為有一年前HIT爆的雕魚燒雪糕, BU同學仔說:「係呀! 上年好HIT呀! 年年有餘好意思, 你都買畀囝囝玩啦」(佢鍾意食真嘅雕魚燒就真)
(檔位編號172) $148
全場最多人, 行也行不到入範圍一定是100毛. 連阿太望到坐在高梯上的男子也大叫:「林日曦呀!!」. 排隊找腦細簽名的人最少20…人太多, 跟本想看看5大神獸公仔都無可能.
(檔位編號33)
11度的第一個年宵夜市, 維園攤檔雖然較去年少了8檔…但竟然出乎我意料的多人…看來老仁想輕鬆逛年宵, 絶對平日下午會好好多.