2016-09-19
行街市時見到有啲合掌瓜又幾靚，所以就買幾粒返屋企，再加埋鮮淮山，就煲番個健脾滋潤嘅合掌瓜鮮淮山湯！
合掌瓜我都幾鍾意用嚟煲湯，除咗啖湯好清甜之外，煲過湯嘅瓜肉都係好好食。而且合掌瓜可以有祛風解熱、健脾開胃嘅功效。今次我加埋營養豐富同時補脾肺腎嘅鮮淮山，咁就啱晒呢排胃口唔係幾好嘅小小豬，等佢飲多幾碗湯，開下個胃口啦！
材料包括：合掌瓜2個、鮮淮山1枝、鮮百合2小粒、紅蘿蔔1個、蜜棗6粒及西施骨$40
做法：
1.西施骨洗淨汆水；合掌瓜洗淨去心切半；紅蘿蔔去皮切件<
2..鮮淮山去皮切件；鮮百合切去頭尾啡黑色部分，逐塊剝開；蜜棗洗淨（鮮淮山去皮後會有滑潺潺嘅黏液，所以就要戴上手套處理，如果唔係就會痕到冇朋友記得要小心呀）
3.煲內放約4L水，隨水加入所有材料
4.待滾起時，先用大火加蓋煲約15分鐘
5.再轉慢火，加蓋煲多1.5小時<
6.加少少鹽調味後飲得
合掌瓜湯對於我家嚟講真係可以話冇得輸，啖湯清清甜甜啱晒，話咁快每人三碗就清晒成煲湯，兩位老細都大讚好飲呀！個湯好飲就不在講，千祈唔好忘記啲湯料，合掌瓜同淮山都係好有益嘅食材，食埋佢哋就更加滋潤啦！
更多小小豬的湯水:
作者：小小豬的成長日誌
作者：小小豬的成長日誌
