【阿米爸】對BB講疊字 是對還是錯?
2016-10-12
阿女歲半,每當見到有轆的物件經過,就會大聲叫「車車」。巴士如是,私家車如是,連單車、買餸車、旅行喼,在她的口中都是「車車」。
另一例子,每晚飯後我家都會吃水果,每日一款,一句「過來食生果喇」,女兒便會乖乖地走過來,坐在我或太太的大腿上,指著西瓜、蘋果、橙、提子等叫「果果」。
我問了靚女好友,註冊言語治療師鄭婷戈(April),究竟BB要到幾歲,才不會再叫「車車」和「果果」呢?April表示,這問題可以分開兩部分,分別是「BB幾時唔再講疊字?」以及「BB幾時學識講其他特定名詞?」
BB幾時唔再講疊字?
我對BB講疊字這話題非常有興趣,因為我一直覺得女兒懂得叫「車車」和「果果」,都是我和家人一手造成的。只要對著女兒,「低能語」頻道便會自動播放,誇張、高兩度、再加疊字:「BB食唔食包包啊?」,「今日BB好乖乖喎!」。究竟對BB講疊字,是好還是壞?
^全部都是女兒的「車車」
April話:「我哋唔會話好定唔好,因為呢個係正常發展階段,呢種說話方法,我哋個 term 就叫 motherese;2歲以下小朋友講『些少』疊字,其實係可以接受嘅,但如果到3歲仍然過量使用疊字,家長就有必要教導下,自己都唔好再講咁多。」
至於BB幾大才會不講疊字,April話因人而異,模仿力及認知程度高的BB,便可以早點戒甩,但強調在評估語文及說話能力時,並不只考慮小朋友是否講疊字:「句子結構有幾複雜,發到幾多個音,呢啲都要睇。」