【細路最啱】BBQ都可以健康 美食達人教你調天然醃料
2016-10-21
重陽節打風不成沒有帶來三日雨,反而為大家帶來了一陣涼浸浸的天氣。除了提提各位爸爸媽媽為BB著多一件衫仔之外,相信大家都感受到BBQ嘅季節終於來臨,係時候約好三五知己、同小朋友一齊變身燒烤達人喇!
其實大家心知肚明,燒烤好食之餘,著實都唔係好健康,主要因為經高溫燒烤的肉類會釋出有害的致癌物質,簡直是每個食肉獸的惡夢。但原來,只要用啱天然調味料,致癌物的濃度可減至一半!咁就大條道理可以繼續 BBQ啦!
毫無頭緒?無問題嘅,今次特別找來了食譜及美食專欄作家 Kelly Ng (下圖)為大家設計兩款天然醃製食物配方,醃一醃搽一搽,令食物又健康又好味!
1. 香茅橙花蜜醃料
材料:
肉類(如豬柳、雞翼等) 1磅
香茅 3支
乾蔥 2粒
芫荽粉 2茶匙
橙青 1個橙量
生抽 2湯匙
鹽 3/4茶匙
蜜糖 1湯匙
做法:
香茅拍裂後切碎,乾蔥去衣切碎,連其他材料加入肉類中拌勻,醃最少 3 小時以上即可。
2. 百里香檸檬鹽
材料:
百里香 2棵
檸檬青 1個檸檬量
幼海鹽 2湯匙
糖 1/2茶匙
黑椒碎 1茶匙
做法:
採下百里香的葉子,加入其他材料略樁,令味道融合,即可使用。未用的香草鹽可用小盒/樽存放。
以上的材料簡單易買,做法亦非常容易,小朋友都可以落手落腳一齊整。兩款醬料之中,百里香檸檬鹽用於處理肉類、海鮮、甚至蔬菜都十分恰當,可預先製作一樽,處理肉類的話可用作醃料,用於海鮮或蔬菜類也可攜帶到燒烤場即場調味使用!
如果你都唔想BBQ食來食去都只係醬油、蒜頭、蜜糖或者黑椒味道的話,就快啲跟 Kelly 嘅做法探索新味道啦!