【小小豬】 補腦益智南棗核桃杞子茶
2016-10-30
嚟緊十一月頭小小豬就會進行佢嘅第一次考試，話晒都係佢人生第一次考試(佢幼稚園時係完全冇考試依回事)，話唔緊張都真係呃你。咁我一向都唔係怪獸家長，平日都冇迫小小豬太過密集式溫習，好多時都係靠佢自己平日課堂嘅吸收，同埋係做功課時教佢啲唔太明嘅題目。
不過作為MaMi嘅我，唔多唔少都想個仔考出嚟成績唔好太差，所以都係時候抽多少少時間同佢溫下書(真係抽少少就算，因為唔想抹殺佢玩樂時間，始終返左一整日學都會好攰，放學後都要休息下嘛)。除此之外，我都周圍打聽下煲啲咩湯水係可以補腦益智，就係咁我就聽朋友仔介紹，煲左依個健腦又明目嘅南棗核桃杞子茶俾小小豬飲下啦！
其實我都唔止一次聽過話核桃對個腦仔發展係好，因為核桃嘅外形類似我地腦部形狀，可以「以形補形」咁話。當然「以形補形」解說就好冇乜根據，不過我上網睇過啲資料，核桃含有較多蛋白質及人體營養必需嘅不飽和脂肪酸，依啲成分皆為大腦組織細胞代謝重要物質，可以能滋養腦細胞，增強腦功能。另外核桃仁含有大量維生素E，經常食用有助潤肌膚，可以令皮膚滋潤光滑，富於彈性。
將可以養脾、補血及補五臟嘅南棗，再加上明目嘅杞子一齊煲，仲唔係啱晒要用腦力嘅大小朋友。
材料都係好簡單，大部分都係藥材店可以買到。當然好果想買靚少少核桃，就可以係大間啲嘅乾果店買到，不過就一定要買原味，唔好買醃製過嗰啲呀！
材料就是南棗10枚、核桃2兩(約75g)、杞子1湯匙(約18g)及冰糖適量~
先將所有材料浸洗半個鐘後，然後瀝亁備用~
煲內放入六碗水的份量~
