【小小豬】止咳潤肺 印度椰子雪耳瘦肉湯
2016-11-06
自從煲過一次印度椰子湯之後，我依個椰子控都真係愛上左佢，因為佢煲嚟嘅味道真同椰絲好似，仲要係甜甜地，絕對係我附強列推介。當然除左好飲之外，印度椰子都係好有益，佢可以有助止咳潤肺與清熱功效，而且仲可以強壯身體機能，所以又點可以唔令我愛上佢呀！
不過因為季節性關係，都有一段時間係街市上見唔到佢，就算見到都貴好多，師奶仔嘅我就當然覺得唔抵，所以我情願唔煲住。上星期我地三口子又齊齊去油麻地果欄行街，終於俾我又見到，仲要大大粒都只係$15，咁抵當然即刻掃幾粒返屋企慢慢煲。
秋天一到就令我好想食雪耳，尤其係小小豬，自從我話過得雪耳多會好靚仔，佢就不知幾鐘意，次次都食好多，所以今次我就煲印度椰子雪耳瘦肉湯，一次過滿足我地兩個之餘，又可以滋潤同止咳潤肺啦！
材料包括有印度椰子1個、雪耳1朵、南北杏1兩、紅棗6粒、蜜棗3粒及瘦肉約$40~
先將印度椰子切片，可以的話就切薄啲，咁就煲時就可以出味啲~
雪耳浸軟去蒂後切塊；紅棗去核連同南北杏及蜜棗洗淨；瘦肉洗淨汆水~
