【小小豬】番茄豆腐豬肉碎蛋花湯

雖然老火湯係好飲，不過有時簡單嘅滾湯都同樣好味又有益，就好似今日我專為小小豬而設嘅番茄豆腐豬肉碎蛋花湯，就一次過滿足小小豬三個願望啦！

點解會係三個願望？第一就當然係因為小小豬同我一樣都係好鍾意飲湯，一有湯飲佢就開心(當然最好唔係黑卒卒嗰啲啦)。第二就係因為今次啲材料全部都係小小豬鍾意兼有營養，佢梗係食得開懷。最後一個就係….因為呢個係小小豬有份提議，佢仲唔係好有滿足感。

事緣有一日放學，小小豬即刻捉我埋一邊，問我係唔係好鍾意煲湯呀？原來佢喺午膳時去圖書館借咗一本湯類食譜圖書。見到佢滿心歡喜拎本食譜俾我睇嘅時候，都真係有少少感動。所以我就喺圖書入面揀咗呢個湯煲俾佢飲，等佢滿足下先嘛~

不過其實豆腐、番茄、豬肉碎及雞蛋都係一啲好有營養嘅食物素，絕對適合大小朋友呀！

材料就只需要番茄三個、硬豆腐一磚、雞蛋2隻、免治豬肉約$15~

先用1/2茶匙鹽及少少胡椒粉將免治豬肉醃最少30分鐘~

將二個番茄切成番茄蓉，另一個就切塊；硬豆腐就切成粒粒~

煲內加入約1.5L水，待水煮沸後加入免治豬肉滾5分鐘~

然後再放入番茄蓉及豆腐煲10分鐘~

最後加入番茄塊及少少鹽調味，再多煲5分鐘~

煲好後熄火，加入蛋漿拌勻~

成個過程唔使半個鐘(唔計醃肉時間)，就有一個湯飲啦~

又一個好飲有益兼可以當餸嘅一個菜，真係啱晒我呀~

小小豬見到個湯，又喺圖書見到呢個食譜嘅時候，佢真係好興奮，好似話俾我知….原來我都有啲貢獻咁，所以我都留咗幾個食譜，下次再煮多款等佢開心下至得！

作者：小小豬的成長日誌

相關文章：【小小豬】杞子菊花茶

                   【小小豬】簡單易滾西洋菜肉片湯