【小小豬】雪梨麥冬無花果茶

2016-12-03


早幾日奶奶買左好幾個雪梨上嚟俾小小豬食,雖然小小豬都鐘意食生果,不過雪梨都係效寒涼性質,依排轉天氣都唔係幾敢俾佢食,好驚食完雪梨之後會咳,幾經考慮最終都係冇俾小小豬食。

但係….老人家一番心思當然唔可以唔領情,唔可以當生果食,可以用嚟煲涼茶,咁都係一樣落係小小豬個肚仔度,所以我就煲左依個啱天氣又超級滋養嘅雪梨麥冬無花果茶啦!

雪梨同無花果都係滋養啲食材,原來麥冬同樣都可以滋養皮膚,仲可以清熱養陰、潤肺養胃的功效,主治津少口渴、虛煩失眠等徵狀。

材料有雪梨五個、雪梨乾約十片、麥冬約$10、南北杏一湯匙、無花果六粒~

雪梨去芯切塊洗淨;其他藥材用清水浸10分鐘~

煲內放3L水,然後加入所有材料~

待煲滾後,用大火加蓋煲約15分鐘~

再轉小火加蓋煲多45分鐘~

隔渣後就可以飲得啦~

雖然今次加左少少重味嘅麥冬,不過都冇影響愛飲雪梨水嘅小小豬,佢都大讚好飲呀(嗱…依個POSE係佢自己自發去做,擺完之後叫我幫佢影相,唔係我迫佢呀….哈哈哈)~

其實係依家忽冷忽熱又乾燥嘅天氣,大家都一定要好好保重,飲多啲健康嘅湯水,打好個底就唔會咁易病啦!

我就係因為將啲靚湯涼茶留晒俾佢地兩父子,自己飲得少少就算,所以…..又病倒了。下次都真係要對自己好啲,因為病左仲要湊住隻百厭豬都真係幾辛苦呀(發噏風完畢….呵呵呵)!

溫馨提示:由於材料都涉及藥材成分,所以係好因應個人體質,大家記得煲之前了解下自己,或者問下相熟中醫/藥材店職員,呢個湯料啱唔啱自己呀!

 

作者:小小豬的成長日誌

熱門文章

蘋果雪梨水 簡單易整清熱潤肺之選|小小豬
01-08
聖誕小食/甜品食譜 │30款簡易聖誕派對小食食譜 曲奇+cupcake+聖誕樹麵包
11-28
家常小菜|氣炸蝦滑釀雞翼肥嘟嘟啖啖肉 香甜蜜糖味小朋友至愛
12-02
簡易食譜|神還原KFC白汁雞皇飯 材料方便易取 加洋葱口感更好
11-29
秋天湯水|潤肺養顏 印度椰子螺片湯食譜|鄭小b之成長日誌
11-02

湯水食譜|魚片芫荽皮蛋湯懶人食譜5分鐘即成!
2022-11-23
湯水食譜|倪晨曦教煲紅扁豆素湯 材料簡單清肝解毒 一個步驟完成
2022-11-21
湯水食譜|倪晨曦教煲姫松茸羊肚菌茶樹菇素湯:增強免疫力+滋補養顏
2022-11-17
湯水食譜|霸王花豬骨湯 秋天湯水清熱潤肺
2022-11-04
秋天湯水|潤肺養顏 印度椰子螺片湯食譜|鄭小b之成長日誌
2022-11-02
湯水食譜|紅菜頭素湯 補血抗氧化女士必飲
2022-10-25
查看更多   ▸