【明日之星】日本小學生乒乓球比賽 肉緊似馬龍
2016-12-05
依家啲小學生真係唔可以睇小呀!日本舉行全國乒乓球錦標賽,最矚目嘅竟然係小學2年級以下嘅男子單打決賽。事關兩位小學生嘅決鬥媲美成年選手,不講以為自己睇緊奧運啊!兩位小學生都非常認真,真係肉緊到好似奧運選手咁。
黑衫嘅係嚟自東京嘅小學2年級生渡部民人,而紅衫嘅就係嚟自鹿兒島嘅小學1年級生岩井田駿斗。一開始渡部弟弟狀態大勇,贏波時都十分激動,仲有幾分似張繼科!
▲中國男子乒乓球奧運冠軍張繼科
雖然岩井田弟弟一開始比較弱勢,好似俾人壓住個勢咁,但到第四局終於追平對手,睇下佢贏波嗰下幾激動!
▲里約奧運乒乓球冠軍馬龍
岩井田弟弟豪邁嘅身體語言同難以壓抑嘅興奮,肉緊到好似馬龍奧運奪金咁呀!
▲係堅持得到回報嘅呼喊呀!
第四局追平對手之後,岩井田弟弟冇鬆懈,繼續緊咬對手。渡部弟弟都打得有啲吃力,過程十分緊湊。第五局時,岩井田弟弟以9比10成功逆轉勝!好感動、好熱血呀!
▲唔理係奧運定係全日本賽,贏咗嗰一刻對運動員嚟講一定係最大嘅喜悅呀!
岩井田弟弟贏咗比賽之後非常高興,即刻跑去教練身邊。教練都好寵溺咁摸摸佢嘅頭,表示嘉許。但另一邊渡部弟弟就因為輸咗比賽而默默落淚。雖然今次輸咗,但你已經表現得好好,打咗一場好波俾大家睇!唔使傷心,所謂小小苦楚等於激勵,相信十年後,渡部民人同岩井田駿斗呢兩個名會出現喺奧運名單度,到時再睇你哋大顯身手啦!
完整影片:
其他文章:【不得了!】這位小朋友有前途