【LKY的慢活生活】觀塘工廈裡尋回台灣國小的小時光
2016-12-28
今次介紹一間位於工廠區仍然試業中嘅餐廳。
講明試業中，所以唔想摸門釘，一定要打電話去問下先。
講真，而家喺工廠區嘅咖啡店已經十分多，要突圍而出，一定要好俾心機去裝修，仲要做出自己嘅style先得。
要知道筆者係一個台灣迷，如果你都係，呢間餐廳就啱晒啦。
餐廳叫做小時光，聽個名都知道，佢希望你哋喺度搵番屬於你哋嘅小時光。
佢哋主要提供午餐、下午茶以及各式特色飲品。
營業時間暫時為12:00-18:00。
地址：觀塘興業街16-18號美興工業大廈第1期A&B座1樓C1室
電話：31882380（記住打左去問開唔開先）
咁點去呢？觀塘港鐵站B1出口，落橋後一直向前行，直至見到麥當勞。
見到麥當勞代表到達興業街，跟住左轉。
一路行直至見到啲個易拉架。
見到之後過對面馬路到美興工業大廈入口。
之後禁一字，一出lift向右轉，登登登登！到達目的地啦。
門口已經好有old school feel。
舖面嘅面積都幾大，用嘅全部都係學生枱同凳，令你好似返番去細個嗰時咁。
仲有好多漫畫書俾大家睇下。
呢度亦有好多特色小擺設，總之，你帶相機一定無錯。
呢度嘅擺設絕對唔求其，連輔導處都有。
筆者梗係唔執輸影番張。
除此之外，仲有鋼琴俾大家扮下嘢，我同朋友又扮下文靜先。
呢度嘅食物係有set嘅，同埋係自助形式落單，價錢方面大概$45-$60。
筆者叫咗個牛肉飯，朋友就叫咗喇沙海鮮米粉。
佢其實包咗杯coffee/tea，一場嚟到，我哋梗係加錢試下啲嘢飲。
嘢食賣相同味道都十分唔錯。
朋友叫咗杯蘋果soda，筆者就叫咗杯紫薯latte。
一見到朋友個杯，不得了，用test tube嚟裝。
呢枝嘢筆者化學堂都唔知打爛咗幾多枝。
我個杯就十分足料，好好味。
因為仲係試業中，人潮唔算太多，同朋友可以霸一張枱。
今日咁啱撞正落雨，就留咗喺度同朋友一路吹下水，影下相，度過咗一個relax saturday。
大家不妨約埋三五知己，搵番屬於你哋嘅慢活時光啦。
作者：