【小小豬】 化痰止咳 印度椰子川貝鱷魚肉湯
2017-01-15
印度椰子我都真係成日煲，冇法啦….因為有益之餘(又有 化痰止咳 、潤肺清熱同埋滋陰養顏嘅功效)又超香椰子味，真係啱晒我依個椰子控！
早幾日見到有朋友仔介紹左一個靚湯，將印度椰子加埋鱷魚肉乾、川貝同埋海底椰，咁就可以預防氣管敏感同埋咳。之前買落嘅鱷魚肉乾一直都唔知點煲好，見屋企又有一粒印度椰子，加上今晚奶奶又上嚟食飯，所以就嚟試下煲依個印度椰子川貝鱷魚乾湯啦！
印度椰子1個、乾鱷魚肉3-4片(約2両)、海底椰1両、川貝一湯匙(約半両)、紅蘿蔔1條、薑2片及蜜棗2粒【1両=37.5g】
川貝需要先浸1小時~
然係用匙羹壓一壓，可以等啲川貝碎少少，咁就可以出味啲~
鱷魚乾浸大約半小時，然後剪細細塊；蜜棗及海底椰洗乾淨~
印度椰子洗淨切條；紅蘿蔔去皮切塊；薑去皮拍鬆一下~
