【BoxingDad】他/她的名字, 我的姓氏

2017-02-22


黃曉明同Angelababy 喺香港生咗個BB 仔,名人之後當然矚目, 大家最關心嘅係BB 仔到底會似阿爸定阿媽? 定兩個都唔似呢?

20150228CELJ3_1432814913265_240581_ver1.0
網絡圖片

黃小朋友花名叫 「小海綿」, 而另一對明星夫婦劉愷威同楊冪,佢哋嘅女花名叫「小糯米」,我初時以為呢D 花名係為咗保護名人後代嘅私隱而改,但如果大家有印象,去年台灣一宗不幸事件,受害小朋友都有個花名叫「小燈泡」, 原來唔係只有名人後代會改呢D 名。

講起改名,BoxingDad發現香港家長愈來愈鍾意改「風水名」, 即係搵風水師父去幫小朋友改名,因此呢一代小朋友嘅名,會出現好多你以為係化學元素嘅字,例如沚、鉎、 煾、壕、楹、 因為風水師父通常會先睇下小朋友嘅八字、 再夾下父母八字、得出小朋友五行欠乜嘢之後,就建議一D可以補足番五行所欠嘅名,例如想用個「恩」字,而小朋友欠火,就會變左「煾」; 想用個「盈」字, 而小朋友欠木,就會變咗「楹」。

BoxingDad唔會反對人改「風水名」, 但我自己對此就敬而遠之,我家公子個名都係我自己改,原因係我覺得名字係父母送俾子女人生第一份禮物。 將佢由nobody 變somebody, 好比一個卧底終於恢復警察身份,可以堂堂正正講一句:「我係差人。」 當某人個仔/女有咗名之後,佢就唔再係叫「某人個仔/女」, 而係有自己嘅名字。

一份咁重要嘅禮物,BoxingDad唔想假手於人,所以當我知道老婆有咗之後,已經開始構思改名, 而有幾大原則,我覺得係必須留意嘅:

  1. 唔好用D 太深太罕有嘅字
    一係就成日俾人讀錯你個名,一係次次都問你點讀,過一排唔記得又問, 成世都係咁咪話唔煩。
    2. 避免有諧音字
    教中文個Ben Sir 叫歐陽偉豪, 「陽偉」叫叫下就變咗…; 某地產企業高層姓范名統,決定用咩名前最好讀多幾次,避免尷尬。
    如果再小心D,可能就要考慮埋普通話發音會唔會出現諧音,如「健」同「賤」係諧音,「菲」同「廢」都係諧音。
    3. 聲調
    蘇民峰原名蘇民立, 佢改名係因為覺得男人喺社會上做事, 個名要有D 氣勢,所以最尾嗰個字叫起嚟要夠響亮。「立」字讀起上嚟唔夠響, 所以佢幫自己改咗個「峰」字。
    有位牙醫,叫莫黃維, 成日俾人叫錯做黃醫生, 因為「莫」同「黃」發音相似。
    改名除咗讀出嚟要好聽, 仲要小心會唔會用咗D 好易令人講錯嘅字。
  2. 意義
    意義呢樣嘢有好多種睇法, 可以係你對小朋友嘅期望, 如健康、 聰明等,文化水平高D 可以引經據典,亦有一D 係情景描述,其實咩意思唔緊要,重要嘅係將來小朋友大個問你點解改呢個名俾佢時, 你識得講番出嚟就得。
  3. 筆劃
    唔係指風水個D, 只係考慮筆劃嘅數量多少,方便書寫,如非必要太多筆劃嘅字應該避免,如「曦」、「靈」等。

對以上原則有咗概念之後,就要開始揀字, 我哋當然識唔晒所有字,所以最好就係準備一本字典,呢D 咁少用又阻地方嘅嘢千祈唔好買,去圖書館借啦,乜典都有。

唔講唔知,讀字典其實幾有趣,好多中文字都有深遠嘅意義,只不過平時少用而忽略,分分鐘你嗰個用叿幾廿年嘅名可能有你意想不到嘅意義, 兩公婆睇下讀下,講下笑下, 亦不失為一種生活情趣,好過對住部手機啦。

最後提醒大家,新生BB 係出世42日內(星期日及公眾假期除外) 申請出世紙, 係免費,係免費,係免費 (重要的事講三次),42日後至一年內做, 就要收140蚊,而如果一年之後先申請,咁就要先得到登記官同意, 仲要俾多680蚊先申請到。攞咗出世紙之後,BB 就有自己正式嘅名喇。

參考資料: 入境事務處
http://www.immd.gov.hk/…/birt…/Registration_of_a_Birth.html…

作者:BoxingDad

熱門文章

【向4歲兒子訴苦反被啟發】周柏豪音樂監製周錫漢 疫情下開設網上頻道教幼兒知識
08-01
【 視像診療 】媽媽用家分享:足不出戶 睇醫生 ,方便又安全!
07-29
【移民英國】三大英國各城市的治安排名分享︳倫敦mama
07-19
【BNO移英】網傳外傭可申請家庭傭工簽證陪僱主移英? 英國移民局詳細拆解僱主迷思
07-30
【移居英國】英國最高危、最安全住宅區列表統計+各郡5大罪案平均數字
07-09

【父職ABC】爸爸,怎樣才算與子女關係良好呢?你必須知道的三個關鍵字︳ 招雋寧
2020-06-23
【父親節】抗疫物理治療師 視像維繫天倫情更深
2020-06-21
【父親節】為見證子女成長 西廚轉職車長
2020-06-21
【兩種爸爸】你是「天生決定型」還是「時間取決型」?研究發現這一類新手爸爸與幼兒更親近…
2020-05-25
【爸爸學堂】土耳其的體驗式課堂 讓大男人站在孩子角度看世界
2020-04-27
【成長遊戲】全職爸爸GK育兒養成遊戲
2020-04-20
查看更多   ▸