【仙妮】新發現！如何令寶寶安靜地自行入睡？
2017-03-28
丘BB出世以來都係瞓BB牀，而且一向都係訓練佢自行入睡，所以唔使哄同抱住瞓。
我哋係用漸進法的，即是喺BB醒著時將佢放上牀，輕拍她，輕聲說：Goodnight! I love you~ ，確保佢一切安好，然後離開房間，通常佢會開始喊，我就等3～5分鐘（視乎是輕泣定係狂哭），然後返房間再輕拍她、安撫她。如果佢繼續喊就一再重複，每次等多3分鐘先再入房，直到佢瞓著為止。
要令BB自行入睡嘅秘訣係：夠狠心！
BB當然係時刻都想黐住媽咪，有好多媽咪因為唔忍心BB喊好似好可憐咁，結果每次都要抱住又哄又搖先瞓到，一放落牀又醒番，辛苦媽媽又令BB不能熟睡。其實只要你轉一轉心態，個心就會好過啲～BB睡前喊係一種令佢鬆弛情緒嘅方法，釋放一下能量，之後就會瞓好啲！所以喊吓都唔係壞事（喊太耐另作別論！）
而當丘BB愈來愈大愈懂事，睡前喊嘅原因又多了，尤其是學識企之後，放佢瞓低轉頭又企番起身⋯有時會哭鬧大半個小時先瞓著。雖然知道佢始終會累會瞓，但每晚都聽到佢嘅喊聲真係幾洩氣⋯⋯
後來我嘗試咗一個新方法，可以令丘BB完全唔喊自己瞓著！！！真係開心到要撒花～～
所以好想分享俾各位媽咪～
首先，睡前的程序沒有變：洗澡>入睡房吃奶>開小夜燈玩一下講吓故事（同時因為大了後不用掃風，要俾時間佢自己hur 氣！），大概玩15分鐘之後熄燈至全房漆黑。最初，丘BB會有D驚，我會攬住佢唱睡前曲安撫佢，又俾佢攬住自己鍾意嘅公仔，咁慢慢就唔會驚。由於熄咗燈，所以會快啲有睡意，大概5-10分鐘後，等眼睛熟習漆黑環境，見佢打瞌睡或捽眼就可以放佢落BB牀>拉上睡袋>俾奶嘴＞俾公仔，之後講:Goodnight ~I love you ~ （全程摸黑進行）然後離開房間！完成！
通常丘BB會好安靜咁入睡，只係試過幾次會喊吓，但1~2分鐘就瞓著，唔使我再入房安撫！Very Good!!!
我發覺呢個方法同時可以令BB入睡後瞓好D，冇咁容易醒，因爲之前開著小夜燈咁瞓始終對睡眠質素都唔係咁好，佢瞓瞓吓醒一醒見媽咪唔喺身邊可能又會喊。。。
不過我諗呢個方法係要大一點嘅BB先有用，如果太細仲好怕黑缺少安全感嘅BB最好等大啲先試喇！
希望呢方法幫到大家，令到湊B生活少一樣煩惱啦～
作者：仙妮