【小小豬】五指毛桃雪蓮果瘦肉湯

前幾日上網見有媽媽教煲依個春天養生湯，剛好我係等小小豬放學行小店時又買到五指毛桃，所以就試下煲依個五指毛桃雪蓮果瘦肉湯，俾我地三口子嚟養生。

其實五指毛桃我之前都煲過一次，佢煲出嚟嗰一陣好香椰子味，真係好好飲呀。不過因為唔係成日有得買，所以我冇再煲了。原來小小豬返興趣班附近嘅乾貨小店有得買。將五指毛桃加埋可以清肝解毒嘅雪蓮果同埋粟米及紅蘿蔔一齊煲，就可以養肝健脾啦！

材料都係好簡單，五指毛桃二両、雪蓮果一個、粟米二條、紅蘿蔔二條、陳皮一角及豬肉眼約$30~

五指毛桃是桑科榕屬灌木或小喬木，所謂五指毛桃，其葉片像人的手掌般五指散開；全棵植物都披上灰色的絨毛；果子像桃子一樣，所以名為五指毛桃。五指毛桃藥用是其樹根部份，越老的樹根，功效越好。佢有益氣健脾作用，强身健體，行氣化濕功效。(網上資料)~

五指毛桃先用冷水浸泡半小時~

瘦肉洗淨汆水；陳皮浸軟刮去皮瓤~

雪蓮果、粟米及紅蘿蔔去皮切塊~

煲內放約3L水，然後隨水加入陳皮~

待水煲滾，然後放入所有材料~

再煲滾後用大火加蓋煲約15分鐘~

之後轉慢火加蓋煲多2小時~

最後加少少鹽就飲得啦~

雪蓮果、粟米及紅蘿蔔依啲材料本身都係甜，所以啖湯味道真係好清甜，再加上五指毛桃又帶有淡淡嘅椰子香味，所以小小豬同老公都話好飲，小小豬仲攪笑到話俾我100分，叫我繼續努力，下次都一樣要有100分啦(乜咁似我同佢平日講嘅嘢…..哈哈哈)！

溫馨提示：由於個別人仕體質不同，所以大家記得煲之前了解下自己，如有疑問，請先向註冊中醫查詢！

作者：小小豬的成長日誌

相關文章：

紓緩咳嗽紅糖薑茶

健脾祛濕粟米鮮淮山瘦肉湯