【柯豬媽媽】 BB食譜分享 – 雙薯焗雞批
2017-04-13
今次諗出黎嘅食譜 <雙薯雞批> 係為柯豬度身訂造,希望通過不同食材配搭同煮法令佢接受被佢say no嘅有益食物,而今日嘅主角就係<薯仔&蕃薯>!
大家見得多又食得多,但可能你無諗過薯仔、蕃薯嘅營養價值係比一般蔬果更高!
上網一search不難發現原來<薯仔>所含的vitamin C是蘋果的10倍,vitamin B雜是4倍,各種礦物質(磷、鈣等) 是幾倍至幾十倍不等。而<蕃薯>則係所有的薯類之中維他命C含量最為豐富,以維他命E的含量來說足足是糙米的兩倍,還有豐富的纖維素,幫助克服便秘。好處太多,不能盡錄。
所以有睇開柯豬媽媽嘅朋友會發現我好喜歡煮蕃薯薯仔,加啲心思令本身極唔鐘意嘅柯豬乖乖地開懷進食。
材料 :
雞肉 (鮮雞/急凍), 約½拳頭size
洋蔥,¼個
蕃薯 & 薯仔,各½個
西蘭花,½碗
麵粉 (高低中筋都可以), 1大茶匙
水 & 雞湯小量,加埋1小碗 (可以只用水)
調味 – 黑胡椒 (black pepper) ,時蘿碎 (Dill weed), 肉豆蔻粉 (nutmeg powder)
步驟:
- 各材料洗乾淨,雞肉去皮去骨切粒;洋蔥切碎;蕃薯薯仔去皮切粒;西蘭花切成小花。
- 蕃薯薯仔粒用蒸焗爐較100°c蒸20分鐘至淋身。
同時, 開中火燒熱鑊,用少量植物油炒香配料。
先落洋蔥,炒至半透明加入雞肉,見轉色就可以落埋西蘭花。全部煮到8成熟, 落少量黑胡椒及時蘿調味,倒入麵粉拌勻循,再逐少加入雞湯和水,煮至杰身,熄火備用。
喺蒸焗爐取出雙薯,用叉壓成薯蓉,可以加少少黑胡椒粉和肉豆蔻粉,增加風味。
**Tips**如果對象係大B,壓蓉中途趁熱加一小片無鹽牛油 & 少量牛奶/豆漿,會更香更滑啊!
4. 準備入得焗爐嘅碗仔,先放入蔬菜雞肉至半滿,再將薯蓉覆蓋喺面,鋪平。用叉喺表面輕輕力”界”幾行花紋,焗出黎睇落會精緻啲 🙂 哈哈~
5. 將碗仔放好喺焗盤上,放入蒸焗爐轉用烤焗(Grill)模式, 以180°c焗 15分鐘 直到薯蓉表面金黃色就大功告成喇!
作者:柯豬媽媽
相關文章:
【柯豬媽媽】乳酪迷思 : Natural Yogurt vs Greek Yogurt vs Greek Style Yogurt + 好用App分享