周永恆玩失蹤拒離婚 趙頌茹: 都唔知可以點！
2017-05-19
^為了兩個寶貝女，生活再艱苦阿Yu都得撐住。
趙頌茹（阿Yu）與周永恆的離婚案拖拉至今仍未解決，據悉雙方要先就兩女撫養權取得共識，惟男方拒出庭聆訊兼玩失蹤，還反咬阿Yu已收取一百萬贍養費，故拒再為兩女付任何責任，面對前夫這種無恥行為，阿Yu也無計可施，唯有努力工作，靠自己養活兩個女。上周六，阿Yu出席開張活動，全程笑容滿面任賓客拉住影相，人肉佈景做足大半粒鐘才功成身退，問到離婚案進展，阿Yu坦言要見步行步，「完全搵佢（周永恆）唔到，又唔肯傾條件，都唔知可以點！」
以「人渣」自居的周永恆有幾賤，相信唔使多講，三年前被揭對阿Yu家暴兼搞婚外情，分居兩年多來，周永恆不時高調拖女出來威，卻從沒養過兩個女，要阿Yu獨力孭起頭家。
^周永恆過去兩年來不時快活攬女，但就拒養自己兩個女。
周永恆龜縮拒出庭
據悉離婚案至今仍未解決，全因男方缺席聆訊兼拒絕溝通，「阿Yu都冇話要贍養費，只希望佢可為兩個女的基本生活費盡點責任，但周先生完全唔回應，拖住唔離婚，可能係想用嚟做擋箭牌，唔使被班新女友迫婚。」知情者透露，因雙方未能就孩子撫養權達成共識，故只有原地踏步，等法庭處理。
^單親媽媽唔易做，女兒成為阿Yu生命動力。
面對沉重的經濟壓力，過去大半年乜Job都接的阿Yu，上周六便以代言人身份出席醫美診所開張，見有記者在場，阿Yu煞有介事，但仍笑笑口任影，問到離婚案進展，她無奈地說：「 家最重要傾掂兩個女撫養權，但佢（周永恆）唔出庭又唔回應，根本聯絡唔到佢，都唔知可以點。」
^阿Yu去年成功創立網購平台，可能收入微薄。
頭條日報授權轉載