【Saron】涉及孩子的說話要小心
2017-06-30
前兩日，我爸跟我說「教會好多人都覺得你老公錫個女多過錫個仔喎！」
坦白說，別人的說話都不用太介意，尤其是非事實。我老公有幾錫我哋對仔女，我比任何人都清楚。可能說的人只是隨口講句，但其實有好多說話都不可亂講，特別涉及小朋友。
強哥以前總是口響響說，囡就可以隨時攬隨時錫，到佢結咗婚我都可以同個囡手拖手，囝就唔同啦，要硬淨要MAN，結果而家咪又係日日攬住個囝狂嘴狂抱。
有邊個見到平日個囝一喊，強哥就第一時間撲去攬？有邊個見到半夜三更，個囝唔舒服扭計，我老公抱住佢兩三個鐘坐喺個瑜伽球度un足兩三個鐘到個囝訓著都唔捨得放佢落牀？有邊個見到佢望住個囝果個笑容有幾滿足自豪甜蜜？就肯定唔係教會嗰班評論他的人囉！
其實我知道每人都有自己的無聊野要講，但涉及小朋友的就要小心。現在兩個孩子還小，未必聽懂，但大多少少，就好易聽明大人的說話。他們半知半懂會想「爸爸原來錫家姐多過錫我…嗚嗚…」「爸爸原來錫我多過錫細佬，好嘢！」等等….
別人的說話我們控制不了，只可以盡力灌輸正確的觀念事情給我們的孩子。不過，作為「教會人」，我知道不應該但都或多或少對他們有高一點的期望，我這件小事只是小中的小，是非八卦嘢在教會圈子不斷，卻是更令人噁心。希望我們作大人的在說每句話之前都可以想想，背後有多影響別人的感受，特別是辨識能力較低的小朋友，別傷他們的心，尤其是談及他們與父母兄弟姊妹的關係。
P.S. 或許有人會覺得我好小氣「使咪咁大反應呀？」，但涉及我家人的事，硬著頭皮我都要保護！要說就隨便說！
作者：Saron