【藝術樂園】不需要培養小朋友好奇心，只需要好好保存
2017-10-03
每一次上堂，小朋友嘅問題都會讓我思考不停，每堂都玩腦筋急轉彎。作為一個老師，回答問題係我責任，亦係學費包的。當然只係講笑，小朋友嘅問題每一個都好珍貴，呈現一份未有被泯滅的童心，以及他們學習的動機。
好多家長都希望培養小朋友好奇心，令他們在學習道路上，可以較得心應手。其實只要我們不拒絕孩子提出的疑問，已經是十分重要的要訣。聽起上嚟好似簡單到我呃咗大家睇我寫嘅嘢，但我喺街上面觀察到嘅，足以證明依個要訣要實行並不容易。
就以行就嚟破產嘅反斗城為例，每次入到去總有一兩個小豆丁，喺度問依樣嗰樣係咩嚟架？而你一定會聽過有爸爸媽媽會一臉不耐煩地答個小朋友，「你唔需要知道」或者係「講咗你都唔識」。
家長一日對足依個「問題兒童」咁多個鐘，真係再多心力都會透支，作為戰友，我係深表同情。奈何，我哋要一字記之曰：「忍」依啲說話真係少講為妙！小朋友可能就咁抹殺一切對學習嘅熱情。
家長必須要知道，小朋友本身就係好奇心嘅載體，根本唔需要培養，要嘅係好好保存。孩子提問大人，原因係我哋係小朋友眼中嘅「權威」，佢哋會覺得我哋年長，所以有一定閱歷，可以同佢哋分享經驗。可惜我哋都心力交瘁，作為已經喺社會打滾多年嘅成年人，我哋都存在怠惰嘅心態，缺乏求知慾。所以要引導小朋友學習，家長都必須每事由「從哪裏開始」去探索更多的知識。
作為孩子成長的同伴，我哋都要抱疑問嘅態度，無論任何孩子有興趣想知道嘅事情都向事情本質出發。例如孩子問：「點解爸爸你杯咖啡味道咁特別？」爸爸可以由咖啡豆係點嚟開始同小朋友一齊去求證，因為疑問的態度會引伸出不同的探索可能，孩子會由咖啡豆的種植開始，漸漸接觸到佢周邊嘅資訊，然後我哋可以再向孩子提出更多小疑問，要孩子習慣「擴散性思考」，將因果串連。
如果每個小朋友的問題我哋都認真對待，並且收起我哋成年人，覺得一切都要概括承受、理所當然的陋習，孩子會發覺學習的趣味，並且日後遇到更多問題嘅時候，都可以從記憶寶庫中，將學返嚟嘅所有資料活用，舉一反三。
我哋不得不承認，學校的教育在於「灌輸」，但真正的教育應該在於個人主動性。因此，我哋要保守好小朋友每一個發問嘅機會，因為學習從來都唔需要你講我聽，而係獨立探索、互相影響。
作者：Canace@藝術樂園
其他文章：