【葉偉麟】高IQ 低EQ
2017-11-23
六歲獨生男童,就讀本地名牌小學,學業表現出眾,可惜自我情緒控制力極差,可謂高IQ低EQ,經常和同學發生衝突。他在家中稍不如意,就會對工人動武,至今已經轉換了數個工人。
家長:「佢好易發脾氣,工人一唔啱佢心意佢又打人又掟嘢,無晒佢辦法!」
我:「咁當時有冇即時處理小孩子嘅情緒?」
家長:「佢好激動!完全不受控!」
我:「爸爸媽媽平時點對工人呢?」
家長:「都算唔錯,但有時工人做錯嘢,激到自己好嬲都會話佢兩句。」
我:「阿仔會唔會受到父母嘅「身敎」影響?覺得呢個就係解決問題方法?」
家長:「我哋最多同個工人講嘢粗魯啲,但從來冇郁過手喎?」
我:「一直嘅語言攻擊已經令佢錯覺工人係次等嘅,係可以用來做發洩對象,於是缺乏了一份尊重。」
家長:「我不嬲教佢要尊重人!點解佢會聽唔入耳?」
我:「例如呢?」
家長:「我話你做人要有禮貌,唔係呢個世界就冇人理你。」
我:「但事實上,似乎工人換完一個又一個,咁小朋友點解要有禮貌? 其實,當小孩子發脾氣嗰一刻,先係令佢學識管理情緒嘅好時機。就好似你想學游水一樣,一定要將身體浸喺水入面先係第一步。」
家長沉默細想,然後說:「……即係佢同工人衝突嗰陣,反而先係學習情緒管理好時機?」
我:「全中。」
家長沉默不語。
男孩來到治療室接受治療,他多次都選擇利用同一把軍刀,演繹出他的內心故事。
起初,這把軍刀不斷被用作殺戮妖怪,在他的內心世界,他是一個破壞者,他擁有無窮無盡的強大力量。 這樣他經驗到自己是一股非常Powerful 的力量。可以摧毁任何外敵。
後來,他倒轉過來演繹一條鯊魚,被那把強大軍刀追殺,由原先的「破壞者」, 180度轉變成為「受害者」。說穿了,他在經驗到對方「工人」的內心恐懼。
後來一天,男孩突然有了轉化,
說:「依家條鯊魚要做手術,我同你即刻幫佢開刀,一齊救佢。」
同一把軍刀,由追殺惡魔力量,變成自覺恐怖的武器,再轉化為自我拯救的手術刀。
男孩的行為及信念,亦隨着軍刀的力量而轉化了。
男孩:「點解我之前做乜嘢你都唔阻止?」
我:「我相信你講緊最重要嘅故事。」
兩個月之後家長對我說:「我哋呢排家庭關係改善咗好多,佢冇晒啲暴力行為,係咩令佢有咁大改變?」
我:「一把雙刃刀,孩子選擇相信,自己係一把善良嘅軍刀!」
完全接納,製造覺醒平台,讓孩子自行選擇強大力量用於摧毀或拯救。
Child Lead 正是改變行為的秘訣。