【森林的童話 】新手孖媽的8大挑戰
2017-10-12
一次過打孖上，我一下子就成為兩個BB嘅媽媽；照顧佢哋凡事都有好多第一次，就講下我經歷當中印象最深刻嘅8個挑戰啦！
- 分唔清樣貌
森林雖然係異卵雙生，但啱啱出世頭兩星期真係好似Copy and Paste一樣！孖媽我時常分唔清楚邊個已經食咗奶或換咗片，亦經常將佢哋放錯喺對方嘅牀仔。後來公公婆婆買咗粒玉仔，佩戴喺腳上，就容易分啦～
- 飲食作息時間表
對孖媽嚟講，飲食作息嘅時間好重要。尤其係決心餵母乳嘅孖媽。初生至3個月時，如果兩個同時食同時瞓，3個鐘頭食一次奶，孖媽斷斷續續加埋可以瞓到4至5個鐘，已經好好了。但現實係孖B通常食奶節奏不一，或者當中總有一個會醒瞓啲…
父母可以連續瞓到3個鐘已經係個遙遠嘅夢想～我生完森林後半年，就好似斷片一樣，完全唔知道自己做過乜嘢，瞓唔夠係人生最痛苦嘅事情！後來，我無再堅持兩個一齊食人奶，長老們都會幫手夜晚餵奶，情況就開始改善！
- 出街困難症
好羨慕啲媽媽坐完月就可帶BB出街～老實講，我和森林爸二人盡全力，都要等到森林半歲之後，先帶到佢哋去第二個社區。
孖B每次出街都要準備好多嘢，奶粉、尿片、奶樽等全部乘二。如果預計出門時間超過3個鐘，即係等於兩餐食奶時間都在外，更要帶多兩倍嘅物件。森林更常喺我哋準備出門口時，輪流嘔奶、濕片；幫佢哋換好衫同片之後，又差唔多夠鐘食奶，無限循環，門口…有排都出唔到～
後來，我哋係出發前一半個鐘開始準備，寫一張清單作提醒，出門成功率就大大提高！
- 隔離飯香
點解孖媽通常都為孖B著一樣嘅服飾？森林愈大，我就愈明白… 雖然玩具衣服都係同款，但如果唔同顏色，就會俾佢哋感覺人哋身上嗰件係好啲～
