【小周董世界】原來健康院檢查可以免費拎Materna
2017-10-23
知道懷孕後我同第一胎一樣都係會選擇喺政府醫院順產,所以除咗去醫院做檢查外,亦都會去健康院做例行產檢,健康院檢查有好有唔好,唔好就係相對要等的時間長D,同埋無得照超聲波,所以除咗政府提供的產檢,我亦會去私家醫生做產檢,嘻,始終透過超聲波見到BB好似開心D同埋放心D。但去健康院檢產都係必要嘅,至少醫院可以有紀錄,到生產時萬一有咩問題,都可以CHECK番紀錄,同埋政府所有產檢都係FREE,有時間都會去檢查確保BB健康。^^
早前第一次去健康院檢查時,職員會先叫你登記同埋派發一個淺綠色的袋仔,袋仔都有D重量,其貌不揚的衛生署袋仔….仲要咁重我真係想放棄拎,但由於唔好意思拒絕最終都係拎咗,等待檢查期間打開個袋仔,入面除咗有幾本育嬰小冊子,最重要發現有一本好靚的《寶寶成長日記》。原來由去年開始,健康院都會派發一本非常精美的Chocolate Rain《寶寶成長日記》,鼓勵新手父母在日記本上記錄寶寶的成長點滴。
WOW~ 好大本好厚啊!! 大約有80頁的《寶寶成長日記》,入面有不同主題如「給寶寶的滿月信」、「寶寶足印」及「寶寶小趣事」等,鼓勵父母透過文字及照片,記錄寶寶的成長過程直至1歲,發掘生兒育女的珍貴時刻。
每頁都有不同的插畫,公仔真係好靚,仲有足夠頁數可以俾新手父母紀錄BB成長的點滴。
《寶寶成長日記》同時會提供育兒實用資訊俾新手父母,亦有提示嬰兒需要接種疫苗的時間表、母乳餵哺小貼士、家居安全注意事項,及親子玩樂的小貼士等。
最後連貼紙都有2頁,真係超級精美。所以大家去到健康院檢查時,千祈唔好放棄拎呢個淺綠色袋仔啊~哈哈!