【慈慧幼苗】育兒鬆一Zone：識得讚，一定用『快、真、準』來讚

農曆新年將至，相約好朋友出來暢談近況，她說了一則讚賞兒子的趣事，令我啼笑皆非。

我們在餐廳坐下後，朋友便急不及待地向我說：「你上次教咗我，當見到小朋友做咗好行為時要用『快、真、準』嘅技巧去讚佢，上星期我喺屋企實習一吓讚我嗰仔，點知就出事喇！」

我立即好奇地問：「出事？快啲講嚟聽吓！」

朋友仔細地描述：「當時阿仔拉咗幾張紙巾出嚟用，跟住將紙巾掉入垃圾桶，於是我就讚佢：『你真係好乖呀！』佢嗰刻好開心，報以一個非常燦爛的笑容。點知過咗一陣，我見到阿仔不停咁拉啲紙巾出來，仲用好期待嘅眼神望住我添，想我繼續讚佢。」

朋友說話未完，我已經捧腹大笑，「證明你讚賞小朋友嘅技巧仲有進步嘅空間喇！」

朋友尷尬地笑一笑：「係喇！後來我反省到原來我讚佢唔夠『準』，令佢以為我讚佢拉紙巾係好行為，其實我係想讚佢有手尾，將用完嘅紙巾掉入垃圾桶，以後讚阿仔真係要準確啲。」

「係呀！最重要係讚清楚咩行為做得好，咁樣佢先會明白㗎，一句乖，佢真係唔知道邊個行為先係乖。加油呀！你會愈嚟愈識讚！」我鼓勵朋友。