【超詳細】媽媽全體驗 政府、私家順產大不同：俾多啲錢生B值得嗎?
2018-03-12
原來好多人以為入得私家醫院梗係開刀，順產去政府就得啦。我兩胎都順產，兩款都試晒，又同大家分享吓有咩分別
🙋🏻♀️（注意：超超超長文）
事源如果第一胎唔係產檢知道珈珈一出世就要兒科跟進，第一胎已經揀咗私院生啦。當時問咗私院一出嚟都係即刻要去返政府檢查，所以就唔勞民傷財囉。反而又俾咗多一個體驗我
認真，呢啲一生人無幾多次經歷嘅野，生B真係半隻腳踏入鬼門關。經歷晒兩款之後，更鼓勵大家要對自己好啲唔好慳呢啲
如果你另一半同你講件事好奢侈，不如睇晒先講，咪委屈自己。
產前檢查：
揀邊度生都係會政府+私家兩邊睇晒；唐氏，糖尿，驗血果啲政府做；再自行驗埋T21
作動入院嗰一刻：
公
政府係方便嘅，因為不論call白車定自己去；間醫院一定係最近，同埋即使假宮縮放流料，都係經濟實惠。
私私家好似我咁，由西貢去跑馬地，如果返工時間作動就大鑊，所以果朝6點幾都出車去左先。但35周嗰鋪假宮縮未生得變咗留院一日檢查，就玩咗我$17xxx。同埋34周前一定要去政府，太早產私院唔收，所以可以過左34周先去落訂。