【Scientific Papa】讚得咁敷衍,不如唔好讚
2018-03-28
現代父母都明白稱讚小孩的重要性,很多研究都指出讚係孩子成長不可或缺的;但香港的父母好多時忙到一個點,就係連讚孩子都唔可以「嘥時間」。於是讚的變得敷衍,聽的仲可能會有反效果?!
「爹哋,睇下我畫咗我哋一家人呀!」「嘩!好靚喎,你好叻喎!」
「爹哋,睇下我今個星期可以彈到Do Re Mi呀!我彈俾你聽吓!」「聰明喎!一個字:『醒』!」
有時,當筆者忙於事務,而又真心覺得小朋友真係做得幾好,點都會俾番幾秒個女,讚一下佢。諗住咁都叫做回應咗吖,但就無諗過咁讚個小朋友,除咗無心敷衍交行貨外,仲會有反效果……
其實有好多唔同嘅研究都發現,三歲以上嘅小朋友,面對唔同嘅稱讚方法,會作出唔同嘅反應,有時,你以為自己讚緊佢啲良好行為,反而會令佢染上惡習。
最近多倫多大學都發表咗相關研究。佢哋讓3至5歲的小朋友玩遊戲,當小朋友做得好的時候,一組小孩被研究人員稱讚「做得很出色」,另一組小孩則被研究人員稱讚為「很聰明」。之後研究人員要求小孩唔好在玩遊戲時「出老千」,然後離開房間,再用閉路電監察小孩的舉動。研究發現,被讚做得好的一組小孩如常努力完成遊戲,而被讚聰明的小孩較多會為咗贏而「出老千」。