【綿綿媽媽】與綿綿爸爸拍拖日-感覺好Sweet
2018-05-09
兩星期前綿綿爸爸趁放假,陪我去Sky100 及西九龍海濱長廊散步,順便幫我影幾張孕照留念。當時陀住綿綿bb第32週,個肚感覺重咗好多呀,所以行得好慢,行一陣都要坐低唞唞。不過呢日都好開心,因為好似好耐未試過同綿綿爸爸出外拍拖嘅感覺。
本身想租家庭單車,但原來無呢款租,行行下遇到西九文化區嘅無人駕駛穿梭巴士,之後就八卦問可唔可以坐,原來呢部係全港第一架,現在進行試驗中,工作人員話可以俾我地試坐測試,測試完上網輸入意見就可以了。
所以我哋就上車試坐了整個路程,車身都幾可愛,好似麵包車,入面總共有10個位可以坐。開車時工作人員用遊戲機手掣操控,之後就開始轉做無人駕駛mode,如果遇到前面有車或障礙物,車身就會自動剎停,如果發現前面的車未離開,就會自動發出bb聲,提示前面。整體來講車內環境舒適整潔,行駛程度適中,唯一係自動剎停時,較為突然,不夠暢順。工作人員話,公司會綜合所有意見,改良後先再引入第2部或以上的新車,作為香港一份子,我同綿綿爸爸都好樂意上網輸入意見!
落車後,我哋開始行下散步, 影下相。發現呢度唔同晒,無晒木地板喇,不過印象中已經最少5年無來過,發現原來都有唔少一家大細來呢度遊玩,都幾寫意。我諗將來我同綿綿爸爸都會帶綿綿來呢度行下或踏單車放電呀!
行到中途,見到個景有樹有草地,綿綿爸爸就係度幫我拍多幾張相留念。
其實我知道綿綿爸爸工作真係好忙,你收工盡量都會趕返屋企陪我,大部分產檢及講座你都會盡量抽空陪我去。雖然知道你平時工作已經要幫人影相拍片,但連放假時候,都要你帶相機出來。呢日好多謝你放假陪我和綿綿出外散步,幫我影相,我覺得好感動。將來綿綿出世後,貪心既綿綿媽媽仍然希望你同樣可以抽到時間陪伴我們,多多親子吓!
綿綿媽媽的足跡
https://www.facebook.com/sukimama2018/
https://www.mamibuy.com.hk/home/13092
https://wow.esdlife.com/sukimama
作者:綿綿媽媽