【綿綿媽媽】回顧懷孕第6-9個月產檢歷程

2018-05-09

回想起踏入懷孕第24週（第6個月）開始，時間過得特別快，感覺沒有頭5個月咁慢長，開始有少少唔捨得懷孕嘅感覺。 “綿綿bb” 真的很錫媽媽，懷孕期間沒有帶俾媽媽太大不適，加上綿綿爸爸對我萬分溫柔，令我覺得好幸福。

4 Jan 2018

呢日係第24W+1D，如常去健康院檢查、量血壓、驗尿、聽bb心跳，全部正常，但姑娘見我的體重只重得3Kg，覺得比正常人重得少，所以安排我再見醫生，最後醫生check 過bb 好正常，都算叫肥b不肥媽，所以叫我不用擔心，完全無問題了。之後另外幫我book 了期，第28週到瑪嘉烈醫院做妊娠糖尿測試，希望到時過關啦!

27 Jan 2018

當日係懷孕第27週，定期去咗私家醫生度做產檢 (St. Paul 謝慧貞），因為政府無得照超聲波，為咗安心，我同綿綿爸爸都會定期去探下綿綿，睇下佢喺肚入面嘅情況。雖然次次都覺得張相好抽象，唔識睇，但知道綿綿一切健健康康，生長速度正常，就好滿足了。今次醫生話綿綿好健康， size 合格，令我哋好安心。

31 Jan 2018

呢日係懷孕第28週，剛剛第7個月。到瑪嘉烈醫院進行妊娠糖尿測試。前一晚至當日要空腹 8小時，但可飲少量水。到醫院第一件事首先要空肚抽血，之後飲一大杯好甜嘅糖水，幸好我當時帶了一支飲管，所以較易入口。飲完糖水後，要再等2小時後再去抽血，仍然要空肚，唔可以食嘢，否則測試就唔準確。幸好有綿綿爸爸陪我去，因為我真係好怕痛及打針，有佢喺度陪我，感覺會無咁驚。最後抽完第二次血就可以走得，我第一時間就要食嘢，因為怕餓親綿綿呵！醫院話如果一星期內沒有收電話，就屬於正常及過關！幸好最後我沒有收到電話，好開心，又過一關。

8 Feb 2018

當日係懷孕第29W+1D，到健康院檢查，今次除了量血壓、驗尿、磅重及聽bb 心跳外，姑娘用尺量我個肚size 及用手摸bb 位置，check 到原來綿綿bb已調了頭，綿綿好叻叻呀，一切都好順利。

24 Feb 2018

呢日係懷孕第31W+3D，去St.Paul 做產檢，謝醫生話照到綿綿bb係入面游緊水，心跳正常，現在bb體重1.5kg，size 正常，因為仲有2個月時間，bb 總體重去到3kg 就達標，但又盡量唔好重過呢個磅數，因為我身型比較細小，怕bb太大會好難順產。其實我呢段時間已經開始覺得個肚好重，行路係有些少吃力，不過我仍然覺得一切都是值得的！

8 Mar 2018

呢日係懷孕第33W+1D，原來已經踏入第8個月，時間過得真快。綿綿爸爸陪我去健康院產檢，如常平時基本檢查，不過今次驗到尿液有蛋白，所以要再驗多次，幸好第二次驗到正常。之後等見姑娘摸肚聽心跳，及check 有無腳腫，幸好全部正常，最後姑娘俾咗個期我下一次到瑪嘉烈醫院產檢。

17 Mar 2018

呢日係懷孕第34W+3D，去左St. Paul 做產檢，謝醫生話綿綿BB 有2.3kg，size正常，進度好好，胎水及胎盤位置都正常，但來緊盡量唔好食太甜及太多澱粉質，怕bb大得太快，會難順產，總之 target 3kg 內就足夠。數數日子，原來當日離預產期倒數日子仲有38日，感覺時間開始過得好快，心情愈來愈緊張!

22 Mar 2018

當日係懷孕35W+1D，到瑪嘉烈醫院進行產檢，今次磅重終於比未懷孕前重咗8kg，可能綿綿大咗及我自己都食返多小小嘢，基本上所有都正常，另外醫生幫我約了下星期做乙型鏈球菌檢查，通常係35-37W 呢個時期都要檢查，因為如果有菌，順產時會傳染給BB。所以我又再次緊張起來，第一怕痛，第二怕唔pass，不過我明白無論結果係點，都要努力面對呵!

28 Mar 2018

呢日懷孕第36週，剛剛踏入第9個月，去瑪嘉烈醫院做乙型鏈球菌檢查，一路等一路驚，因為要將棉花棒插入陰道及肛門取樣本去化驗，一直都怕痛嘅我，最後居然無我想像中痛。我都盡量學之前醫院教既呼吸方法去放鬆，最後唔使1分鐘就檢查完，即時鬆一口氣。希望結果pass 啦！