【小周董世界】小朋友的TROUBLE快速馴服燥底媽

2018-04-24


對住小朋友有時真係又愛又恨,好鍾意佢哋咁純真咁可愛,但佢哋麻煩起上嚟真係好得人驚!!! 好多人話TROUBLE 2 好煩因為2歲小朋友開始有主見,自我意識強,識得SAY NO,但又未識守規則,上一秒仲好可愛,下一秒可能已經發脾氣狂叫,總之長期挑戰父母底線。

我本身個人都屬於燥底,屋企入面負責鬧人的大奸角一開始就已經由我來擔當,小周董2歲開始識得曳的時候,我就開始使用60分貝聲量鬧人,喝止佢D大大小小曳曳行為。

2歲的時候,佢曳但一聽到我高分貝的鬧人聲都會即刻停止,然後喊住低頭乖乖聽我教訓,再同我SAY SORRY,所以小周董的TROUBLE 2其實都唔算好麻煩。

TROUBLE 2順利渡過後,話咁快來個TROUBLE 3,觸發點係工人姐姐要離職,小周董忽然間性情大變,每日哭鬧,食飯喊沖涼喊瞓覺喊,返學好乖但回家變身百厭仔。

小周董的TROUBLE 3最令人頭痕係鍾意出手打人,一有唔開心就動手拍打人,有時甚至對住爸爸都出手,爸爸開始同我企同一陣線,一齊做對嚴父母,每次小周董做出任何無禮貌行為,我同爸爸會一致對佢嚴厲教訓,採取鬧的方法,對TROUBLE 3的小周董都幾有效,至少改善咗打人習慣,亦少咗無理發脾氣,但細聲鬧係唔聽,我要燥底媽上身,鬧佢的聲量由70分貝…慢慢去到80…90….什至100先WORK =.=”’

好境不常TROUBLE 3隱定下來,最近竟然來個恐佈TROUBLE 4,可能因為我有咗細佬B的關係,小周董的TROUBLE 4情緒可以話係大起大落,其實喺我大肚期間小周董日日暖男上身,日日話要照顧我,仲成日對住個肚傾偈同唱歌仔,不知幾SWEET。

但細佬B出咗世後,佢好似感受到有一個人出來,原來唔係可以即時同佢一齊玩,而係分薄咗大家對佢的關注,恐佈的TROUBLE 4就開始來了。

原本可以自己食飯自己訓覺,而家通通做唔到,瞓覺一定要搵人陪先瞓到,仲要拖到實一實先肯瞓。

牛高馬大有成45磅重的小周董,而家行幾步就話攰要爸爸抱, 真係重到呢 =.=

細佬B出世後其實我同爸爸擔心佢呷醋,已經用大部分時間來陪佢周圍吃喝玩樂,細佬全部交俾工人姐姐照顧,可惜佢依然長期鬧脾氣、攪破壞、叫佢做一佢做二,越係唔俾佢愈要做,我哋鬧佢,佢就發惡掉嘢,露出一個委屈模樣…然後大喊!!!

我同爸爸鬧佢的聲音分貝由80….100……..再去到爆表120,點鬧都無改善,有時鬧完佢,佢明顯條氣唔順,就擺出一個串樣(唔順氣),黑人憎情況令我同爸爸又嬲又傷心。

點鬧都無用,我真係覺得好無奈,同埋好沮喪。日鬧夜鬧令到我呢個燥底媽終於壓力爆標,有一日當小周董發脾氣,我再無力氣鬧,忽然忍唔住喺佢面前大喊咗一場,我嗰刻覺得我生細佬出嚟為咗你將來有伴,但呢個決定會唔會係錯? 因為妒忌令到你由暖男變咗燥男 ~>.<~

我攬住佢大喊同佢講﹕可唔可以俾番以前的乖寶寶我? 我想要番以前有禮貌的好寶寶。小周董見到我喊,明顯呆咗成個人軟化咗,扁晒嘴眼濕濕攬住我,之後仲應承我會乖,當天全日都好有禮貌, 無發過脾氣!!! 

忽然我都來個自我發省,原來有時對小朋友唔可以一成不變,以前佢受硬唔受軟,唔代表日後用鬧呢個方法可以用一世。我同爸爸要多D溝通同互相提點,將原本想鬧佢的說話變成讚佢,佢態度唔好、擺出一個串樣,我哋會笑住同佢玩住講:: 呢個樣唔係咁靚,我哋掃走佢,俾D靚牙仔我睇下,笑樣真係NICE好多喎。

盡量將佢d曳行為淡化,減少鬧佢變成多D讚賞,有時見到佢真係太曳開始失控時,即時攬住佢,原來一個擁抱可以令到大家氣沖沖的情緒降溫。另外比佢多d接觸細佬,就算只係每日15分鐘都好,都盡量俾佢同細佬傾下偈、玩下,同細佬有多d交流。

佢一D頑皮的行為如果唔會有危險,我地都盡量唔再阻止俾佢自己試,例如有次佢玩貼紙玩到周圍貼,我唔再鬧佢,反而同佢一齊玩,一齊黐到成面都係,大家關係好咗FRIEND咗,講乜佢都容易接受D,一星期後佢想再玩,唔再係自己拎出嚟亂貼,竟然係好有禮地問我可唔可以同佢一齊再玩貼紙。

雖然我天生燥底,但媽媽為咗想佢地2兄相親相愛,希望哥哥做一個有禮乖寶寶,因為佢…我的起心肝變得溫柔….由燥底媽變身<忍>者。

小朋友的TROUBLE真係年年都有,雖然有時真係忍得好辛苦,每次佢曳曳的時候,我都好想再次開動我120分貝的聲量去鬧佢….但一諗起如果今次我鬧佢,佢第日又會用返呢D說話駁嘴,我個樣愈兇恨,佢對我就愈無禮,所以我快速收歛咗自己燥底性格,將個<忍>字刻咗喺額頭,而家屋企無再家嘈屋閉,連我老公都話從來無見過我,好嬲但好溫柔呢個矛盾樣…哈哈

各位燥底媽……加油啊!! ^^

 www.facebook.com/1437ritaandhim

www.facebook.com/1437ritaandhim

歡迎大家給予意見,如有任何邀稿或產品試用,請電郵聯絡: ppqq1437@yahoo.com.hk

作者:小周董世界

熱門文章

【爸媽熱話】父母7大「不合格行為」惹熱論 網民:好有同感!
08-10
【親子育兒】疫情期間的升小準備
08-12
【親子教養】為甚麼孩子不願意認錯?
08-14
【育兒心得】點解小朋友突然成日扮BB 專家:多因壓力 不願成長作逃避
04-26
【研究證實】小朋友多砌積木6大好處 改善社交能力 提升數學成績
03-28

【適量壓力】我們為甚麼製造玻璃心世代? │苗延琼
2020-08-14
【第三個童年】做家務賺零用
2020-08-14
【親子教養】為甚麼孩子不願意認錯?
2020-08-14
【護苗教育】男孩子如何避免誤會?| 張錦芳教授
2020-08-12
【家庭生活】對待父母和子女,願有高品質的相處,不要低品質的陪伴|小羊貝貝
2020-08-12
【家庭生活】婚後反而沒有家,有孩子後更沒有自己的房間 | 小羊貝貝
2020-08-12
查看更多   ▸