【綿綿媽媽】"綿綿"帶給我的懷孕徵狀

陀住綿綿bb差唔多38w，都想同各位媽媽分享呢段時間既害喜，我諗每位媽媽都有不同徵狀，希望大家能夠多些交流，發現原來有些問題是正常，就無須成日咁擔憂喇~

嘔吐 

我聽過有些媽媽頭3個月會嘔，有些就全個孕期都嘔，我總算幸運，暫時從未嘔過。

胃賬

整個孕期都有胃賬感覺，所以每次都不能吃得太飽，只能少食多餐。

胃口轉變

我聽過有些媽媽以前鐘意食既食物，會突然唔喜歡食，甚至聞到都會嘔，我暫時無呢個情況。不過以前我唔食既食物，現在會食。有時突然會很想吃某種食物，特別喜歡食麥當勞及薯片，不過都會盡量控制自己唔好經常食。

尿頻

整個孕期都有，頭3個月通常晚間特別多，到後期日間及晚間都較頻密，如果晚上訓著後，更加密，通常每隔1.5小時去一次，直到第二朝早上8點。照統計最少要起6次身去小便，所以睡眠質素有時未必太好，不過幸好我可以有午睡時間補充。

便秘

頭3個月都算暢順，第4個月開始就有便秘問題，唔知關唔關食左多種 Materna 維他命而容易便秘呢，不過每天要盡量吃多份水果， 及飲多些暖水就會有改善。

胸部脹痛

頭4個月胸部特別感到脹痛，但到後期呢種感覺就慢慢消失了。

晚上失眠

通常係夜晚覺得急小便，所以難以入睡，另外整個懷孕期間都會有緊張及擔心既時候，尤其是產檢前一日或等報告的日子，所以間唔中都會失眠。

日間渴睡

頭3個月會容易累及眼瞓，中期反而無特別，第7-9個月又再開始容易有眼瞓感覺。

胎動

第5個月開始感覺到胎動，好似金魚游來游去，到第7個月就開始活躍，現在9個月，綿綿更加用力，仲經常郁，特別係夜晚，有時突然比佢踢到肋骨，成個人即刻痛到精神晒。

口乾

我頭5個月特別口乾，尤其是夜晚，但到中期反而無乜感覺，第8-9個月又開始出現番。

嘴唇甩皮

整個孕期都是這樣，特別係冬天時候，搽極潤唇膏都不足夠。

皮膚乾及痕癢

頭5個月皮膚勁乾燥及特別痕癢，尤其是patpat 及大腿小腿位置，但懷孕後期呢種感覺慢慢又消失了。

妊娠紋

可能我第3個月開始已經搽妊娠紋油，所以暫時未有發現妊娠紋。

突肚臍

聽過好多媽媽都會突肚臍，但我整個懷孕期未見有出現，可能個個都唔同啦。

情緒起伏

我整個懷孕期比較容易喊，容易笑，容易唔開心，睇電視劇情都會有影響，不過通常好快無事，但懷孕期間，可能腦海太多野諗，心情會較多變化，所以情緒較易起伏。

三角位痛

頭3個月經常痛，好似經痛感覺，原來係子宮擴張既原因，到了懷孕中期就沒有感覺，但到懷孕第7個月開始就有扯住痛，原因係bb大左，壓住子宮，所以我後期行路都會有小小痛。

頭痛

我懷孕時期其實好少頭痛，不過如果我喊完就會即時頭痛。

腰痛

懷孕第7個月開始，有時會感到少少腰痛，可能肚子又大又重既關係，不過keep住做下產前運動及fit ball，會有幫助的。

肩痛

懷孕頭4個月我有肩痛，但到中後期反而沒有。可能人人反應真係唔同。

盤骨痛

我懷孕第7個月開始盤骨痛，可能之前睡眠姿勢無變，後來我嘗試每隔一段時間轉下姿勢，盤骨開始唔痛，慢慢有改善了。

腳抽筋

聽聞有些媽媽經常發生，有些媽媽從未發生過。而我整個懷孕期間一共出現大約5次， 次數唔算太多及唔算嚴重，幸好有綿綿爸爸即時幫手按摩就可以了，我記得係第6個月開始第一次抽筋，聽人講食鈣片、食芝士、飲康鈣C，飲奶都有幫助的。

浮腫

有些媽媽都會係懷孕後期特別浮腫，包括面，手，腳。而我係第8個月發現有幾日，隻腳腫左，但過左3日又無腫了。

***暫時我腦海只諗到咁多，如果其他媽媽有特別徵狀，歡迎分享比我知及交流下呵！

整體來講， 我覺得我整個懷孕期間，都不算是太大不適，所以我覺得自己已經好幸運及幸福，綿綿一定好錫媽媽的。

下一步就係要面對陣痛，順產分娩既痛，仲有2星期，就到預產期，真係好驚好緊張。「綿綿媽媽一定會加油！」希望各位媽媽生產順利！

綿綿媽媽的足跡

https://www.facebook.com/sukimama2018/

https://www.mamibuy.com.hk/home/13092

https://wow.esdlife.com/sukimama

作者：綿綿媽媽