【TimTam仔】坐月有秘訣：體質可以比生產前更好！
2018-05-28
各位準媽媽，坐月真的好重要！我都曾經諗住當自己西人坐月，咩禁忌都唔會理！但最後因好朋友的教訓，我就乖乖做足晒坐月要做的事！好多人話，生產過後，如果好好調理進補，氣血經過調理後，將以前身體不好的毛病都可以調整，體質可以比生產前更好！原來係真架！
不如先講下我坐好月之後，身體有甚麼好的轉變：
1. 嚴重經痛從此消失
我係有嚴重經痛，痛到係會頭暈落唔到牀，食晒止痛藥都冇乜用！但生完阿B之後，坐完月大約產後四個月再嚟經期，從產後第一次嚟經期開始，我的嚴重經痛完全消失，一d痛的感覺都冇，係嚟咗都唔知！完全冇諗過會咁神奇！個種感覺係猶如重生一樣！
我真係有d後悔，應該要早d生仔！可以痛少幾年！
2. 不再怕冷
以前我好怕冷，手腳經常冰冷，老公話熱要開冷氣，我要穿長袖外套！產後竟然和老公調轉，當我熱到出晒汗，我老公竟然話覺得涼！
3. 精神好咗，冇再容易頭暈
我身體一直不太好，經常都會頭暈，但坐完月後應覺精神咗，唔再頭暈，亦冇咁容易病！
睇完我親身的經歷，係咪覺得坐好月好重要呢！就只講冇咗經痛已經好值得！我係得到好朋友的分享，佢第一日出院已經洗頭，以前佢係從來都唔會頭痛，產後佢就開始有頭痛問題出現，叫我真係要聽傳統的說法去坐月。