【海笑】前戲比戲肉更精采的玫瑰疹

無……其實之前都聽過玫瑰疹，話細路哥發完幾日高燒就會出，出完就以後唔會出。我唔記得自己細個有無出，是但啦，都預個仔會出。

話說有一日，阿仔發燒，喂阿哥，四十度，但唔覺佢辛苦，除了體溫同平時無分別，都是跑來跑去，爬高爬底。咁好啦，食住之前醫生開的退燒藥，唔係太得，最盡落到三十八度，最多落到三十七點五。做父母，梗係驚啦，但當日是假日，又見佢行得跳得食得瞓得，同平日完全一樣，算，等聽日。當時老婆都有話，可能係玫瑰疹。

如是者，第二日都係三十八度左近，同樣行得跳得食得瞓得，即係……我仲病過佢。第三日，喂，仲未退燒，我終於識驚，帶佢睇醫生，醫生就話有三個可能性，耳仔發炎（唔記得實際叫咩名）、尿道炎或玫瑰疹，最後佢都係畀退燒藥，同樣補多個做法，睇多一晚，第四日都未出疹，驗尿睇吓係咪尿道炎。

第四日，真係出玫瑰疹，這隻疹，孩子不痛不癢，三日便退，事前發燒好似仲得人驚。就係咁，屋企又多支退燒藥，但我相信，十個家長，十個都會去睇醫生，始終燒到四十度，鬼知咩事咩，而對於小朋友任何不適或異樣，我都係建議，睇醫生啦，真係唔好當自己係醫生。

作者: 海笑

Facebook: 海笑OceanLaugh

其他文章：

【海笑】對，會放棄很多。

【海笑】精神呀喂