【慈慧幼苗】了解成長發展 調整合理期望

上星期，相約幾位中學同學出來聚舊，大家都已經為人父母，各自育有幾歲大的小朋友，所以話題都離不開管教子女方面，我當然樂於傾聽。

席間，朋友A首先發言：「我兩歲大嘅囡囡填顏色時成日都出晒界，隔離屋個仔都係同佢一樣大，但畫啲畫好靚，仲攞過獎添！」

朋友B插嘴：「我三歲大嘅仔仔咪又係一樣，寫字唔靚，所以我成日會擦晒佢啲字，迫佢再寫過。」

朋友C附和道：「我個仔專注力好差，次次同佢去飲茶，坐唔夠一個鐘就周身郁，扭計要走。」

朋友D更和應：「講起就嬲，我阿囡三歲大已經識『駁嘴』，真係俾佢激死。」

正當大家你一言我一語之際，朋友E似乎看不過眼，帶點激動地表示：「其實，兩、三歲嘅小朋友正處於塗鴉期，佢哋嘅小手肌仍未發展成熟、執筆嘅力度同姿勢都未發展完整，所以填顏色會出界，同埋寫字寫得唔靚係正常不過嘅事；幾歲大嘅小朋友專注力只有十幾分鐘，所以無可能要求佢哋坐定定一個鐘飲茶吧；而且識得『駁嘴』證明佢聰明、語言表達能力強同轉數快，我覺得作為父母唔好只從負面角度睇小朋友嘅行為表現。」