【90後P牌媽咪】點解生咗BB之後出街成日遲到？其實我哋都係迫不得已

唔知大家生完bb之後，有無發現約朋友出街，經常性都會遲到呢？哈哈，我自從生完之後，好多時約朋友出街，都預唔啱時間出門口，8成時間都係會遲到，唉！其實已經好盡力想早出門口，但永遠都係會遲，因為出門口總有好多嘢要搞！！

我放假多數都會帶埋bb出去玩，每次出去，都會提早個半鐘整理，又要揀下自己著咩衫、又要化下妝、執下自己嘅手袋，已經無左半個鐘。跟住就要執定bb出街要用嘅野，又要double check有無漏嘢。然後我就會餵定佢食奶，出街都餵完少餐，餵完又要幫佢換片、換返件出街嘅衫仔，搞搞下又成個鐘。

最慘嘅係有時出門嗰陣，佢竟然poopoo！！！！跟住又要由頭黎過⋯⋯換片、洗patpat，有時可能仲要換衫⋯⋯ (°ཀ°)

當你覺得完咗屋企呢段挑戰就可以全速前進咁去目的地就錯喇！因為推bb嘅我哋搭地鐵出去，係要不斷等lift、兜路。假日d旺區，d lift係會勁多人排隊，不論係有需要定正常人都會排，而地鐵d lift唔知點解好多都好細部同好慢，如果前面有人，真係等成5分鐘先上到去出閘位，出閘仲要再等lift出地面⋯⋯最記得係有次等lift，明明我都夠位入，而又寫住比有需要嘅人用先，結果d叔叔ssss唔排隊打尖之餘，仲唔讓比我入 (#`Д´)ﾉ 結果我要等多兩三班lift先有得入⋯⋯ 明明到咗目的地都係要再遲多十分鐘(´ﾟдﾟ`)

因為推bb車實在太唔方便，所以我依加如果出去一陣間，我寧願孭住佢出去就算，起碼可以搭扶手電梯，出左閘都唔洗兜路行。

唉，朋友們，其實我地真係唔想成日遲到，只係我哋出門口，實在太多嘢要準備同處理，好多事都預計唔到，希望你地唔好介意亦明白我地多d啦( ´•̥̥̥ω•̥̥̥` )

留意我Facebook同IG會更快知道我既Update架！
Facebook：https://www.facebook.com/90sMummy/
Instagram: https://www.instagram.com/minarainlo/