【僑蛋.搗蛋】大台「B來了」嫲孫衫帶出嫲嫲的愛

最近大台劇集「B來了」係我每晚都一定要收睇既節目，個種追劇既心迫使到我可以連碗都唔洗住都要坐係到睇，簡直就好似番番去學生時期日日追劇既年代咁。

過往幾集講出左新手媽咪既內心感受，晚晚受盡奶奶既干涉，導致精神壓力爆燈。正當集集睇得咬牙切齒既時候，突然今集又出現左個奶奶內心小劇場出黎，當中個件「嫲孫衫」我忍唔住笑左出黎，件衫真係好有創意，哈哈，佢表達左一個嫲嫲對孫女既愛錫同期待，當佢攬住個隻著左嫲孫衫既熊仔望住個電視機喊既時候，我又不禁鼻子一酸…將來自己仔女大曬，我係咪又會好似佢咁樣自己攬住公仔係到喊？

今晚既劇集中有一句好觸動到我既心..劇中奶奶同新抱講「我明白，我地舊時湊小朋友同你地新一派照顧小朋友既方法唔同，但我地都係錫個B」(大概意思），我不禁反思到底點解我地會咁討厭奶奶？然後我發現其實我地唔係討厭奶奶，只係我地對自己既BB太著緊，著緊到根本唔想有任何一絲既差錯。當奶奶帶住佢地認為岩既育兒知識黎，而個種育兒觀念根本係唔正確，加上奶奶「講極唔聽，自把自為」，我地太怕太怕出左我地理想既軌道。於是我地開始語氣強硬，手段強硬，到最後互相爆發…到最後大家不瞅不睬，當大家無到，誤會越來越深，最嚴重既後果黎個唔係你死就我亡，迫個老公兩揀一個。但其實我地都忘記左個初衷，大家都係為左個BB好。