【食得唔好嘥】熟透香蕉整無糖班戟
2018-08-31
天氣熱，水果好快熟，尤其香蕉。一大梳買返屋企，同小朋友一人一隻仍然食唔晒，出現斑點再唔食就好嘥。其實熟透香蕉最好用來做甜品，例如班戟，加蛋加少少班戟粉、麥皮及奇異籽，不用加糖已經香滑好味，落埋朱古力粒，用來做早餐或茶點，小朋友一定鍾意食！
?
香蕉班戟（2塊）
材料： 熟透香蕉1條、蛋1隻、麥皮10克、奇異籽15克、班戟粉10克、油1茶匙、朱古力粒15粒左右
做法：
1.香蕉切件，搗爛。
2.拌入雞蛋，加入麥皮、奇異籽、班戟粉及油。
3.熱油鑊，倒入粉漿，灑上朱古力粒，加蓋以中慢火煎焗約1分15秒，過程中會見班戟漲起及邊緣起油泡，可視乎平底鑊的傳熱速度加減煎焗時間。
4.反轉另一面再煎焗1分鐘。
5.疊起班戟，加糖漿及水果，即成。